24 августа 2011 г.
Анатри Хурасана пырса кĕнĕ çĕрте пысăк кирпĕч çуртсем тÿрех куç тĕлне лекеççĕ. Икĕ хутлă, шурăпа хĕрлĕ кирпĕчсемпе эрешлесе купаланă, типтерлĕн сăрласа илемлетнĕ çурт хăйĕн патне туртать тейĕн. Хуралтăсем вĕр çĕнĕ. Ку хăтлă та илемлĕ çуртра Валерий Александрович Васильев хăйĕн пысăк та туслă çемйипе пурăнать. Вăл çак ялтах 1971 çулта кун çути курнă, çакăнтах пурăннă. 1975 çулта çуралнă Вăрнар районĕнчи Ярмушка хĕрĕпе Зоя Федоровнăпа çемье çавăраççĕ. Тăватă ачана пурнăç çулĕ çине тăратассишĕн ырми-канми ĕçлет мăшăр. Аслă хĕрĕ – Юля, Лебедев ячĕллĕ чăваш наци лицейĕнче 10-мĕш класра ăс пухать. Амăшĕн йăмăкĕн çемйин хÿттине лекет вăл, çывăх çынни сарăмсăр вилсе кайнăран. Иккĕмĕшĕ ывăл – Александр, Чăваш Сурăм шкулĕнче 7 класран вĕренсе тухнă кăçал. Дима пĕрремĕш класа кайма хатĕрленет. Пĕр Даша хĕрĕ çеç халĕ амăшĕн хÿттинче. Вăл иккĕре çеç-ха. Валерий Александрович «Новый путь» ял хуçалăх предприятийĕнче водительте ĕçлет. Зоя Федоровна, Чăваш патшалăх университечĕн чăваш филологийĕпе культура факультетĕнчен вĕренсе тухнăскер, халĕ искусство шкулĕн директорĕнче вăй хурать. Çамрăк мăшăр 2004 çулччен хулара пурăннă. Унтан хăйсем хăпартма пуçланă çурта куçса килеççĕ. Таса уйрах çурт çĕклеççĕ Васильевсем. Кил хуçи хĕрарăмĕ те, упăшки те çут çанталăка, ял пурнăçне питĕ хытă килĕштернине пĕлтерчĕç. Çавăнпа хуларан куçса килнĕ те Васильевсем.
Хуçалăхра икĕ ĕне, икĕ пăру таран усраççĕ вĕсем. Чăххи-чĕпписен шучĕ те çук. Кроликсем те тытаççĕ.
Паллах, йышлă выльăх-чĕрлĕхе утти-улăмĕ те, апачĕ те сахал мар кирлĕ. Çавăнпа вĕсем груз турттармалли машинпа мотоблок туяннă. Хăйсене унта-кунта тухса çÿреме çăмăл машина та пур.
Августина
СТЕПАНОВА.