27 августа 2011 г.
Вутланти Толик Семенов амăшĕнчен пĕр шит та уйрăлмарĕ: хулĕнчен çакăнчĕ, саппунран туртрĕ. Анчах та юратнă амăшĕ ăна итлеменçи турĕ.– Аçу часах килет, кĕт кăштах. Лашапа ярăнса та ывăнан ак, – терĕ Раиса Семенова.
Пĕчĕк Толик ашшĕсĕр çула тухаймассине тинех ăнланчĕ, çавăнпах нăйкăшма пăрахрĕ, унăн куçĕ тăруках çуталчĕ.
– Аттене кĕтсе илме хатĕр эпĕ, – салтак пек тÿрленсе тăчĕ Толик.
– Лавккара нумай тăма кирлĕ мар, – ăнлантарчĕ амăшĕ.
Толикăн ашшĕ – Алексей Семенов килти хуçалăхра лаша тытма пуçлани темиçе çул. Ÿркенмест арçын, хăйĕн янаварĕ валли çу каçипех утă хатĕрлет. Ялти чылай çын пек курăка мотоблок косилкипе мар, алăпах çулать. Лашапа ялан турттарать. Кам та пулин пулăшу пырса ыйтрĕ – тÿрех ун патне. Ял çыннине утă кÿрсе пама е анкартинчи çĕрне сухалама нихăçан та хирĕç мар. А.Семеновăн кĕçĕн ывăлĕ Толик лашапа хальлĕхе ĕрĕхтерсе çÿреймест-ха, анчах та ăна тепĕр чух тилхепе хаваспах тыттарать.
– Ывăлăм, çакна асра тыт: ачаран ĕç патне туртăнса ÿсмелле, – асăрхаттарма манмасть ашшĕ ывăлне.
Мĕн калайĕ пĕчĕкскер; Итлемесĕр тăраймĕ, мĕншĕн тесен ашшĕнчен хаклăрах çын çук. Амăшне те авă чун-чĕререн юратать. Толикăн пурнăç çулĕ çине тухиччен чылай тапăçланмалла: шкулта вĕренмелле, алла пĕр-пĕр специальноç илмелле.
– Анне! Атте урампа утса анни лайăхах курăнма пуçларĕ, – хавасланчĕ ача. – Вăл киле çитсен лашапа çула тухатпăр-и;
– Утă тиесе килмелле пулать. Эпир сана хамăртан хăвармăпăр, – ăнлантарчĕ амăшĕ.
Толик килти лаша çине ăшă куçпа пăхса илчĕ. Чунĕпе туйрĕ: паян вăл янаварпа нумай вăхăт ярăнĕ.
Юрий КОРНИЛОВ.