31 августа 2011 г.
Тавăтри вăтам шкулта вĕрентекенсен пĕр ушкăнĕ хĕрÿ калаçу пуçарнă.– Мана çирĕплетсе панă класри вун пĕрмĕшсем асăнмалăх, савăнмалăх та пулчĕç. Лайăх вĕренетчĕç, вĕсем ĕçре те хастарччĕ, – терĕ Алевтина Марковна Алексеева.
Чăнах та, хĕпĕртесе калаçма сăлтавĕ те пур унăн. Иртнĕ вĕренÿ çулĕнче тăван шкулĕпе вун пиллĕкĕн сывпуллашнă пулсан, вуннăшĕ пĕлĕвĕсене малалла ÿстерес тĕллевпе аслă шкулсене вĕренме кĕнĕ. Икĕ яш – Александр Алексеевпа Игорь Гордеев салтака кайнă. Вун пĕрмĕшсем шкулта чи вăйлисем пулнине иккĕн – Даша Назаровăпа Алевтина Маркова район шайĕнче «Çулталăк вĕренекенĕ» ята тивĕçни те çирĕплетет. Ку хĕрсем вăтам шкула та кĕмĕл медальпе пĕтернĕ.
– Çак класс ачисемпе хамăр шутранах Хусанта экскурсире пултăмăр. Вĕсемпе хамăр тăрăхра Çĕнтерÿ паркĕ те çĕклерĕмĕр, – терĕ вун пĕрмĕшсен класс ертÿçи пулнăскер.
Шкул директорĕн вĕрентÿпе воспитани енĕпе ĕçлекен çумĕ Елена Юрьевна Павлова шкулти пĕтĕмĕшле вĕрентÿ ĕçĕ-хĕлĕ япăх мар пулса пынине палăртрĕ.
– «Тăваттă» тата «пиллĕк» паллăсемпе вĕренекенсем 78-ăн пулчĕç. Çав шутран отличниксем 12-ĕн. Предмет олимпиадисене хутшăннисем 23-ĕн. Районта кăна мар, республика шайĕнче те мала тухрĕç пирĕн вĕренекенсем. Даша Назарова уйрăмах çитĕнÿ турĕ, пĕлĕвĕн шайĕ пысăккипе Чăваш Енре те палăрчĕ, – хăпартланчĕ ертÿçĕн çумĕ.
Вĕренекенсен хисепĕ 2006 çулта палăрмаллах ÿснĕ. 200 ачаран чылаях иртнĕ. Çакă Кĕçĕн Тăван шкулĕпе пĕрлешнĕрен çапла пулнă-ха. Пĕтĕмĕшле кăтарту вара урăххи çинчен калать. Ачасен шучĕ майĕпен пулин те хушăнса мар, чакса пырать. Иртнĕ вĕренÿ çулне, сăмахран, 197-ĕн вĕçленĕ. Кăçал пĕрремĕш класа 21 шăпăрлан килнипе вара кăмăллă вĕрентекенсем. Иртнĕ вĕренÿ çулĕнче саккăрмĕшсем икĕ класс пулнă-мĕн.
Вĕрентекенсем çирĕм пиллĕкĕн. Чи пысăк категориллисен йышĕнче Василий Иванович Алексеев, Ольга Михайловна Михайлова, Алина Ильинична Иванова тата Николай Петрович Васильев. Физкультурăна нумай çул вĕрентекен Н.Васильев «Пĕтĕмĕшле вĕрентĕвĕн хисеплĕ ĕçченĕ» паллăна тивĕçнĕ. Йыша çамрăксем хушăнса пыраççĕ теме çук-ха. Пĕрремĕш категориллисем 12-ĕн, иккĕмĕш категориллисем 4-ăн пулсан, коллективра вăтăр çула çитейменнисем вуçех те çук. Юлашки вăхăтра йыша çамрăк директор Сергей Владимирович Петухов хушăннă пулсан, ытти вĕрентекенсем çулланнисем.
Çуллахи канупа ĕç чĕрĕкĕ ăнăçлă иртни куçкĕрет. Сиплевпе сывату лагерне ачасем йышлăн çÿренĕ. Шкул картишĕнчен ĕçлекен ачасем, вĕрентекенсем те татăлман. Ахальтен мар ĕнтĕ пахча çимĕç культурисем парка ешереççĕ, пысăк тухăç парасса шантараççĕ. Тĕрлĕ-тĕрлĕ чечексен клумбисем темиçе те. Шкул картишне илем кÿреççĕ вĕсем. Ял урамĕ çывăхĕнчех пулнăран çынсем те ăмсанса иртеççĕ чечексене.
Иртнĕ çулхи декабрьте шкулăн 125 çулхи юбилейне ирттернĕ. Çавна май унччен вĕренÿ корпусне юсаса çĕнетессипе ĕçсем хĕрсех пынă. Иртнĕ çу кунĕсенче те аслă коридорсене, классене хăтлăх, çутă сăн кĕртессипе тăрăшнă. Туалетсене, сăмахран, хулари евĕр туса майлаштарнă. Шкулта сăрă шăрши сĕвĕрĕлсе пĕтеймен-ха. Пĕлÿ кунĕнче ачасене, вĕрентекенсене те хитре çурта пырса кĕме кăмăллă пулĕ. Пĕлÿ тĕнчинче вĕрентÿ çулĕ тăршшĕпех ÿсĕмлĕ ĕçлеме майсем çителĕклех. Çакна та асăнмасăр иртеймĕн. Тавăт шкулĕ хăйсен мухтавлă ентешĕ – Борис Семенович Марков актер, режиссер тата педагог ячĕпе хисепленсе тăрать.
Г.СВЕТЛОВА.