31 августа 2011 г.
Нумаях пулмасть Элĕк шкулĕнчи çамрăк геологсем Çĕпĕртен кĕмĕл медальпе таврăннă. Вĕренекенсем Пĕтĕм Раççейри çамрăк геологсен уçă уйра иртнĕ олимпиадинчи тĕрлĕ конкурссене хутшăнса малти вырăна тухма пултарнă. Çавна май Элĕк шкулĕнче ăс пухакансем – Искандер Васильев, Ирина Запасова, Альбина Никифорова, Сергей Матвеев, Василий Кротов, Ангелина Викторова, Егор Григорьев, Екатерина Борзова, Артур Митрофанов – хăйсен пултарулăхĕпе таланчĕсене кăтартса тĕрлĕ вырăнсене тивĕçрĕç. Çакăн пек маттур та хастар вĕренекенсене Людмила Петрикова географи учителĕ ертсе пычĕ. Ăна пулăшаканĕ И.Н. Ульянов ячĕллĕ университетĕнчи историпе географи факультетĕнче вĕренекен Максим Никандров студент пулчĕ.
Ачасем вăхăта хаваслă та усăллă ирттерчĕç. Кашни кунах спорт ăмăртăвĕсене хутшăнса малти вырăнсене йышăнчĕç.
Акă, сăмахран, Элĕк шкулĕн команди Казахстан командипе волейболла выляса 2-мĕш вырăна тухрĕ. Ачасем футболла та лайăх вылянă. 4-мĕш вырăна тухма май килнĕ вĕсен.
Асăннă олимпиадăна пĕтĕмпе хĕрĕх ушкăна яхăн хутшăннă. Вĕсенчен ют çĕршывран килнисем те пулнă: Монголи, Казахстан, Узбекистан, Украина, Вьетнам тата ытти çĕртен те.
Геологипе çыхăннă ÿкерчĕк конкурсĕсем те иртнĕ. Унта И. Васильев «Манăн тăван ен» номинацире пĕрремĕш вырăн çĕнсе илнĕ. И. Запасова тăваттăмĕш, Е. Борзова пиллĕккĕмĕш вырăнсене тухма пултарнă.
Геологи отчечĕ те хăйне май интереслĕ иртнĕ. Çак конкурса С. Матвеевпа Е. Григорьев хутшăнса пĕтĕм Раççей шайĕнче 5-мĕш вырăна тивĕçнĕ.
Вĕренекенсем каникула питĕ усăллă самантпа пуянлатрĕç. Вĕсем ачасен опычĕсемпе паллашса, ылмашăнса, ыттисем çумĕнче хăйсене тĕрĕслесе пултарулăха çирĕплетрĕç. Çамрăк геологсем олимпиада тапхăрĕнче хăйсене пур енлĕн аталантарма тăрăшрĕç. Ума лартнă тĕллевсене пурнăçларĕç. Ачасем Раççей шайĕнче мала тухни вара пирĕн чуна савăнтарать, вĕсемпе мухтанма хистет.
Анжелика СИЛИВЕСТРОВА.