03 сентября 2011 г.
Район больницинчи ача çуратмалли çуртра вăтăр ултă çул пĕр улшăнмасăр ĕçлесе, миçе пепкене пуринчен те малтан алла тытма тивнĕ-ши Галина Федоровнăна; Çавна вара шутласа та кăлараймăн. Пĕчĕккисен сывлăх хуралĕнче тăрăшнăскер халĕ тивĕçлĕ канура ĕнтĕ. Ăна вара йĕри-таврара палламан çын çук та тейĕн. Красноармейски район хĕрĕ хăй вăхăтĕнче направленипе Элĕкри тĕп больницăна килнĕ те çавăнтах пĕр улшăнмасăр тимленĕ. Тени ялĕн каччипе Виталий Сергеевпа пĕрлешсе пурнăç тытнă. Унăн ашшĕ Сергей Иванов çăматă йăвалассипе маçтăр пулнă. Таврари ялсенче пурăнакансене çăматăпа тивĕçтерсе тăнă. Унăн ăсталăхĕ ывăлне куçнă. Виталий ку ĕçпе нумай çул аппаланать. Заказсене тÿрĕ кăмăлпа пурнăçласа миçе çынна савăнтарман-ши;
Вăл шоферта нумай çул вăй хунă. Германире салтак службине пурнăçланă чухне те автомашинăпа çÿренĕ. Хыççăн «Прогресс», «Динамо» хуçалăхсенче водительте тăрăшнă. Пыл хурчĕсемпе ĕçлес туртăм вăйлă пулнă Виталий Сергеевăн. Арçын пурнăçри пĕр интереслĕ саманта каласа пачĕ.
– Вĕллине малтанах хатĕрленĕччĕ. Анчах та вăл пушах ларатчĕ. Телее вара пыл хурчĕ киле хăех килчĕ, – терĕ çулланнă арçын.
В.Сергеев пахчара ĕçленĕ чухне сасартăк улакан сасă илтнĕ. Арçын пуçне çĕклесе пăхнă та хура «пĕлĕт таткине» асăрханă. Хайхи хуртсем ăнсăртран тенĕ пек улмуççи çинех анса ларнă. Кил хуçи васкаса шыв илсе тухнă та вĕсене пĕрĕхнĕ. Вăт капкăна лекнĕ те хуртсем. Виталий Сергеевич вĕсене тимлесех пушă вĕллене вырнаçтарнă. Кĕçех пыл та илме пуçланă. Хуртсен çемйи те хушăнса пынă. Виталий Сергеевич та майĕпен ĕç йĕркине хăнăхнă, хурт-хăмăр ĕрчетекен пулса тăнă.
Мăшăрсем килти хушма хуçалăх ĕçне вăйлатса тупăш илессишĕн куллен вăй хураççĕ.
Е.САВЕЛЬЕВА.