03 сентября 2011 г.
Çынна улталаса хăй кĕсйине хулăнлатас текен тĕрлĕ меслет шыраса тупать, суя укçа хатĕрлесе халăх хушшинче сарма та именмест. Ултавçă ытларах пĕр пин тенкĕлĕх купюрăсем хатĕрлеме тăрăшать, вĕсене алăпа тытса пăхса пĕлме те пулать. Суя купюра хучĕ пахалăхĕпе начар, ахаль укçа пек мар, ун çинчи вĕтĕ эрешсем пахалăхсăр, хуçлатнă вырăнти сăрă тасалать. Микроперфираци шăтăкĕсем (1000 число çинче) яка мар. Çутă çине тытса пăхсан хÿтлĕх палли (водяной знак) тĕксĕм йĕрлĕ кăна курăнать.
Кирек хăш вырăнта суту-илÿ тăвас пулсан та тавар туянаканăн тата сутуçăн асăрхануллă пулмалла. Уйрăмах палламан е шанчăксăр курăнакан çын укçа пачĕ пулсан купюрăна лайăх тытса пăхăр. Укçа паракан çыннăн сăнне тата машинăн номерне, ытти уйрăмлăхĕсене астуса юлма тăрăшăр. Уйрăмах пысăк купюрăсемпе асăрхануллă пулмалла, мĕншĕн тесен çавăн йышшисене тума тăрăшаççĕ те вĕсем. Ултавçăсем ватăрах çынсене е ачасене улталама хăтланаççĕ, хăш чухне вара çамрăккисем те улталанаççĕ.
Суя укçа хатĕрлекенсенчен тата ăна саракансенчен саккун çирĕп ыйтать. Саккуна сĕмсĕррĕн пăсакансене 5-15 çулччен ирĕкрен хăтарма пултараççĕ. Енчен те сирĕн е пĕлĕшсен аллине суя укçа лекрĕ пулсан, пĕр тăхтаса тăмасăр, полици пайне 22-3-02 е 89196645059 номерсемпе шăнкăравласа пĕлтерĕр.
А.АЛЕКСЕЕВ,
полици капитанĕ.