07 сентября 2011 г.
1953 çул. Чиркÿ хыçĕнчи уя халăх тырă вырма тухать. Ыраш уйĕнче савăнăçлă та хаваслă çамрăксем хыттăн калаçаççĕ, кулаççĕ. Вăй-халне ниçта чикме çук ĕнтĕ кусен. Пĕр ĕçлесе çеç тамалаççĕ.
Анфиса Давыдовăпа Мария Коннова уйра ăмăртмалла тенĕ пек ĕçлеççĕ. Вĕсемпе юнашар Мария Филипповăпа унăн хĕрĕ Тамара,тепĕр енче Аннапа Пелагея Филипповасем. Пурте тырă вырма пикенчĕç, кашнин куçĕнче ăмăрту хĕлхемĕ вылять. Анфисăпа Мария Тамарăпа унăн амăшне хыçа хăварчĕç. Тарăхнипе куççулĕ юхрĕ унăн, вăл амăшне те васкатрĕ, хăй те тата хытăрах ĕçлеме тăрăшрĕ. Эх, çавăрттараççĕ ыраш кĕлтине, ăмăрту вăйлансах пычĕ. Кăнтăр апачĕ тĕлне нумай та юлмарĕ. Кашниех мала тухма ăнтăлать. Аннăпа Пăлаки хытах тăрăшрĕç. Марипе Тамара вара кая юлчĕç.
Кашни ирех «Боевой листок» хаçат тухатчĕ. Акă, звеньевой çитрĕ. Пăлакипе Анна кÿршисенчен вунă сотăй сахалтарах вырнă иккен. Пĕтĕмĕшле илсен вара вĕсем тăваттăн пĕр гектар тырă вырнă.
Каç тĕксĕмленсе килме пуçларĕ. Ывăннине тин туйрĕç тырă выракансем. Ларса канчĕç, киле çитмешкĕн сывлăш çавăрса илчĕç: ыран та каллех тырă вырмалла-çке-ха!
Тепĕр кунне ирхине Анфисăпа Мария хăйсен хушамачĕсемпе ячĕсене «Боевой листок» хаçатра курсан (ăна кулленех правлени умне кăлара-кăлара çакаççĕ) питĕ савăнчĕç. Юрлас шухăш та тĕвĕленчĕ пуçĕсенче. Вĕсем тата та хытăрах ĕçлеме тĕв турĕç.
Ливерий ФЕДОРОВ,
Ураскилт сали.