07 сентября 2011 г.
Районти «Пурнăç çулĕпе» хаçат парнисене çĕнсе илессишĕн çулсерен ирттерекен ăмăрту кăçал авăн уйăхĕн 10-мĕшĕнче пулать.
Çăмăл атлетсен эстафети «Хĕлхем» физкультурăпа спорт комплексĕн стадионĕнче 9 сехет те 30 минутра савăнăçлă лару-тăрура пуçланать. Командăсене 8 сехет те 30 минутра регистрацилеме тытăнаççĕ. Тĕп шкулсемпе вăтам шкулсенчи 5-9-мĕш классенче вĕренекенсем (3 арçын ачапа 3 хĕр ача) 400 метрă дистанцире чупаççĕ. Аслă ушкăнрисем те (10-11-мĕш классенчисем) çав йĕркепех тупăшаççĕ (ушкăнра 3 йĕкĕтпе 3 хĕр).
Ял тăрăхĕсен ăмăртăвĕнче 3 арçынпа 2 хĕрарăм пулаççĕ. Предприятисемпе организацисен тата учрежденисен командисенче те çавăн чухлĕ чупуçă пулать. Çĕнтерÿçĕсемпе мала тухнисене парнесем кĕтеççĕ. Чи маттурисем вара республикăри «Советская Чувашия» хаçат парнисене тивĕçессишĕн ирттерекен ăмăртусене хутшăнаççĕ.
Ăмăртун тĕп спонсорĕ Н.Ванеркин ертсе пыракан Муркашри чăх-чĕп фабрики тата Журавлев фермер.