10 сентября 2011 г.
Йăлана кĕнĕ йĕркепе Чăваш Енре авăн-юпа уйăхĕсенче «Кĕр парнисем» ярмăрккă иртет. Ăна пурте чăтăмсăррăн кĕтеççĕ: ара, пахча çимĕçе йÿнĕрех хакпа туянма пулать вĕт-ха, таварне туса илекенсем вара ăна нумайрах сутма пултараççĕ. Кун çинчен Чăваш Республикин ял хуçалăх министрĕн çумĕпе Л.Николаевпа калаçрăмăр.– Леонид Григорьевич, «Кĕр парнисем» ярмăрккă ял хуçалăх продукцине туса илекенсемшĕн те, ăна сутакансемшĕн те усăллă. Кăçалхи уйрăмлăхсемпе тата çĕнĕлĕхсемпе паллаштарсамăр.
– Çапла, Шупашкар, Çĕнĕ Шупашкар, Канаш, Çĕмĕрле, Улатăр хулисенче пурăнакансене паха ял хуçалăх продукцийĕпе тивĕçтерес тĕллевпе авăн уйăхĕн 10-мĕшĕнче республикăра «Кĕр парнисем» уйăхлăх пуçланчĕ. Ярмăрккăра сутуçăсем валли ятарлă вырăнсем уйăрнă, куншăн нимĕнле тÿлев укçи те ыйтмаççĕ. Ял хуçалăх продукцине туса илекенсем хăйсен таварне тÿрремĕнех автотранспорт çинчен сутма пултараççĕ, тĕрĕслевпе касса машинисем кирлех те мар.
Ярмăрккăри хаксем пасарсенчи тата супермаркетсенчи хаксенчен 15-20 процент йÿнĕрех. Мĕншĕн тесен таварне урăх çынсем мар, хуçисем хăйсем сутаççĕ, пахалăхшăн та вĕсемех яваплă.
Кăçал тухăç лайăх пулчĕ, апла пулсан хаксем иртнĕ çулхинчен пысăках пулмĕç. Акă, пĕлтĕр çанталăк типĕ тăнă вăхăтра пĕр килограмм çĕр улми 17-22 тенкĕпе сутăнчĕ, çав хушăрах ăна тĕрлĕ çĕртен туяннисем 20-28 тенкĕпе сĕнчĕç.
– Мĕн пĕлмелле-ха ярмăрккăна хутшăнакансен тата мĕнле документсем кирлĕ пулаççĕ вĕсен;
– Хресчен-фермер хуçалăхне, çавăн пекех харпăр хăй кил-хуçалăхне тытса пыракансен регистраци докуменчĕсене, кунпа пĕрлех ял тăрăхĕнчен илнĕ справкăна кăтартмалла. Тепĕр майлă каласан, сутуçăн продукци чăннипех те хăйĕн пулнине çирĕплетмелле. Кун пек чухне суту тумалли лаптăка арендăна тÿлевсĕрех параççĕ.