10 сентября 2011 г.
– Этем вăл кайăк пекех. Ÿссе çитет те ашшĕ-амăшĕн çунатти айĕнчен вĕçсе тухса каять. Хăйне валли мăшăр тупса çемье çавăрать, ача-пăчаллă пулать, – тет Мăн Вылăри çыхăну уйрăмĕнче тăрăшакан Валентина Николаевна Романова.Хĕрарăм хăйне телейлĕ тесе шутлать. Юратнă мăшăрĕ те çумрах, ачи-пăчи сывă та тĕрĕс-тĕкел ÿссе çитĕннĕ. Пурнăçра юратакан, çемье ăшшине çирĕп тытакан çемье тесе калас килет Çирĕккассинчи Романовсем пирки.
– Мăшăрăмпа эпĕ Мăн Вылăра паллашнă, пĕрре курсах килĕштернĕ. Тÿрех пĕр чĕлхе тупнă, – аса илчĕ çамрăклăха Валентина Николаевна.
В.Романова Мăн Этмен ялĕнче çуралса ÿснĕ. Мĕнле килсе лекнĕ-ха вăл Мăн Вылă тăрăхне;
Шкултан вĕренсе тухсан çамрăк пĕлĕвне ÿстерме тĕп хулана çул тытнă. Техучилищĕре оператора вĕреннĕ хыççăн хĕре Элĕкрен направленипе Мăн Вылăри çыхăну уйрăмне ĕçлеме янă. 1985 çултанпа вара Валентина Николаевна ертÿçĕре тăрăшать.
Ватă çынпа ватă пек, çамрăксемпе çамрăк пек тытмалла хăвна. Çакна тĕпе хурса тăрăшать те хĕрарăм.
Николай Никандрович та ялта хисеплĕ çын. 1961 çулта кун çути курнăскер Мăн Вылăри вăтам шкултан вĕренсе тухсан механизатор профессине алла илет. Часах салтака каймалли ят та тухать. Çĕр-шыв умĕнчи тивĕçе пурнăçласа таврăнсан хуçалăхра механизаторта вăй хурать.
Валентина Николаевнăпа Николай Никандрович пĕр ывăлпа пĕр хĕр çуратса ÿстернĕ.
Кил хуçи арçынĕ чылай çул шкулта мастер тивĕçĕсене пурнăçланă, колхозра ĕçленĕ, юлашки вăхăтра ют хуласемпе облаçсене «шапашкăна» çÿрет. Н.Романов нумаях пулмасть предприниматель ĕçне йĕркелесе янă.
– Хальхи вăхăтра çĕр ĕçĕпе ĕçлемесен, выльăх-чĕрлĕх усрамасан ялта пурăнма йывăр, – палăртрĕ вăл.
Унăн хăйĕн трактор пур. Çавна май тĕрлĕ агрегат туяннă вăл. Арçын ир пуçласа каçченех руль умĕнче ларать. Çуллахи вăхăтра утă çулать, кĕркунне вара уй-хиртен кĕме пĕлмест. Механизатор профессине алла илни чылай çăмăллăх кÿрет ăна. Пĕр-пĕр кăлтăк тупăнсан çийĕнчех «хурçă ута» юсама пикенет арçын. Саппас пайсене те яланах алă айĕнче тытать.
– Çемье пуçĕ – арçын. Мăшăрăм ĕçрен ÿркенсе тăмасть, темĕн тума та пултарать, – хăпартланса калаçать мăшăрĕ пирки Валентина Николаевна.
Хĕрарăм хăй те ĕçчен, вăр-вар. Çыхăну уйрăмĕнче ертÿçĕре ĕçленисĕр пуçне хăйсен ялĕнче хаçат-журнал та валеçет.
Вера МОРОЗОВА.