10 сентября 2011 г.
Кино мĕнле аталанса пынине кĕскен çырса пĕлтерес терĕм. Çавна май вулакансене М. Михайлова çырăвĕпе паллаштарасшăн.
М.М. Михайлова Юманлăх ялĕнче 1921 çулта çуралнă. Чиркÿре шыва кĕртнĕ. Ку ялта 15 çула çитиччен пурăннă.
«Çамрăклах Шупашкара кайрăм. Çывăх тăван мана ача пăхмалли çĕре ăсатрĕ. Столовăйĕнче пĕр çул ĕçлерĕм. «Родина» кинотеатр çумĕнче кино кăтартма вĕренмелли курс уçăлнине пĕлтĕм. Унта эпĕ те пĕлÿ пухма пуçларăм. Пĕр уйăхран çĕр-шыв çине тăшман тапăнса кĕчĕ. Иккĕмĕш куннех пире сасăсăр киноустановкăсемпе ĕçлеме ирĕк паракан удостоверени пачĕç те тÿрех яла кайма хушрĕç. Мана Вăрнара кайма сĕнчĕç. Тепĕр кунне кÿршĕ района çитрĕм,районсем хушшинчи кинофикаци уйрăмне шыраса тупрăм. Ĕçе илчĕç. Мана леçме пултаракан лавçăпа аппаратурăпа кинолентă ещĕкĕсем тиесе Абызово ялне çитрĕмĕр. Çав ял хĕрринчех кивĕ шкул ларать, кантăкĕсем те, алăкĕ те çук. Ачасем яла кино килни çинчен пĕлтерсе тухрĕç. Кÿль-хĕри ялĕнчи шкул директорĕ веçех йĕркелерĕ. Билет сутакана та тупрĕ. Кино йĕркеллех кăтартрăм шкул директорĕ пулăшнипе. Хирлеп ялĕнче кино кăтартнă хыççăн тепĕр кунне Юманлăха çитрĕм. Чиркÿрен тунă клубра илемлĕ фильм кăтартрăм. Качалавра, Ехремкассинче, Куракăшра, Элĕк салинче халăха кино кăтартса савăнтартăм. Ытти ялсенче те пултăм. Анаткас-Сурăмра пĕр çынна та билет илмесĕр кĕртмерĕм. Пĕри мана çапрĕ. Тепĕр кунне председатель çав çынна правленине чĕнтернĕ. Юманлăх ялне тепĕр хут çитме тÿр килчĕ. Анчах та мана леçме колхозра лашасем юлман, вĕсене çара ăсатнă. Çавăнпа та бригадир икĕ хĕрарăм тупса пачĕ. Аппаратурăсене çунашкапа туртса кайрăмăр. Çул çук, юр тултарса лартнă. Çавах та яла çитертĕмĕр.
Республикăри кинофикаци пайĕнче сасăллă кино кăтартас курс уçăлсан унта вĕренме тытăнтăм. 6 уйăхран удостоверени алла пачĕç. Кĕçех пирĕн районта та кинофикаци уйрăмĕ ĕçлеме пуçларĕ. Эпĕ районти культура çуртĕнче ĕçленĕ май Элĕкре кашни кун тенĕ пек кино кăтартнă. Ялсене машинăпа каяттăмăрччĕ. Хураçтÿ уявĕнче кăнтăр вăхăтĕнчех кино кăтартрăмăр. Лупашкана та темиçе чĕнчĕç. Пĕр çыннăн пÿртĕнче кăтартрăмăр вара.
Пирĕн çĕршыв тăшмана çĕнтерчĕ те çĕнĕ вăйпа хамăр салтаксен кĕрешĕвĕ çинчен илемлĕ фильмсем кăтартма пуçларăм. «Молодая гвардия» кино кăтартни асран тухмасть.
Халĕ эпĕ 90 çула çитетĕп. 30 çулта пĕтĕмпе 2329 кино кăтартнă, хăшне-пĕрне темиçе хутчен те. Эпĕ «СССР кинематографи отличникĕ». Мана «Ялти киноустановкăсен пĕтĕм Раççейри смотрĕн çĕнтерÿçи» ят панă. Эпĕ Чăваш республикин тава тивĕçлĕ киномеханикĕ. Хĕрĕхе яхăн хисеп хучĕ тăрăшса ĕçленине кăтартать. «Ударник 9-ой пятилетки» орденпа та, «Хисеп палли» орденпа та чысланă мана.
Халĕ эпĕ Тутар республикинче, Набережные Челны хулинче пурăнатăп. Хĕрĕм мана лайăх пăхать».
Э.АФАНАСЬЕВА,
Юнтапа шкулĕнче вĕрентекен.