10 сентября 2011 г.
Кăçал пуш-авăн уйăхĕсенче Кĕçĕн Тăван ялĕнче пурĕ тăхăр туй кĕрлерĕ. Çамрăксем мăшăрлану керменне кайса пĕр çемьене тĕвĕленме кăмăл туни кама кăна савăнтармĕ-ши;Пуш уйăхĕнче Илленушкăнь ялĕнчи Янис Иванов Ольга Андреевана хăйĕн мăшăрĕ пулма ыйтнă. Июнь уйăхĕн пуçламăшĕнче Дмитрий Бурмистров Куславкка хĕрĕпе çемье çавăрнă. Çав кунах ялта тепĕр туй та иртрĕ. Ирина Матьянова Патăръел яшне качча тухрĕ. Июль уйăхĕнче Илленушкăньри Лариса Андреева та туй пĕркенчĕкĕ тăхăннă.
Август уйăхĕнче тата туйсем кашни эрнерех кĕрлерĕç. Чи малтанах Шупашкарта медколледжра вĕреннĕ Светлана Стекольщикова Йĕпреç районĕнчи Сергей Петровпа пĕр çемьене чăмăртанчĕ. Света халĕ хулара ĕçлет, унтах пурăнать. Ĕçчен хĕр темиçе професси дипломне алла илме ĕлкĕрнĕ. Паянхи кун вăл куçăмсăр майпа университетра юридици факультетĕнче вĕренет. Унпа танах ĕçлесе пырать.
Пĕр урамра пурăнакан Софроновсем те кин кĕртнĕ. Артем ывăлĕ салтакран килнĕскер тÿрех авланма шут тытнă. Август уйăхĕн виççĕмĕш эрнинче Наталия Дмитриевская Ехремкасси каччипе пĕрлешнĕ. Уйăх вĕçĕнче пĕр ялтах пурăнакан икĕ çамрăк çемье çавăрнă. Иванпа Ираида Гавриловсем пĕртен пĕр юратнă хĕрне качча панă, кĕрÿ туяннă. Анастасия Гавриловăпа Евгений Яжиков нумай çул хăйсен юратăвне тĕрĕсленĕ хыççăн мăшăрланнă.
Сентябрь уйăхĕн 3-мĕшĕнче те ялта чăваш туйĕ кĕрлерĕ. Геннадий Ивановпа Тавăтри Наталия Железнова пĕр çемьене тĕвĕленчĕç. Пĕтĕм ял халăхĕ пуçтарăнчĕ чаплă туя. Туй арăмĕсем такмак çине такмак шăрантарчĕç.
Çамрăксем мăшăрланни чи чаплă самантсенчен пĕри шутланать. Кăçалхи çул ял туйсемпе пуян пулни чуна хавхалантарать.
А.СИЛИВЕСТРОВА.