14 сентября 2011 г.
Çуллахи каникул вăхăтĕнче хулара пĕлÿ илекен çамрăксем яла таврăнаççĕ. Клубсемпе культура çурчĕсене пухăнса ташă каçĕсем ирттереççĕ, тĕрлĕ мероприяти йĕркелеççĕ.Хуравар ялĕнчи клубра та вунă-вун пилĕк çул каялла çамрăксем йышлăн пухăннине палăртрĕç ялта пурăнакансем. Паян вара унăн алăкĕ хупă, мăн çăра çакăнса тăрать. Клуб çурчĕн сăнĕ самаях тĕксĕмленнĕ. Çуртăн чÿрече рамисен сăрĕн тĕсĕ те кайса пĕтнĕ. Хăшĕ-пĕрин куçĕсем вара вуçех те туха-туха ÿкнĕ. Вĕсен вырăнне оргалит çапнă пулнă, анчах ăна та чăрсăррисем аркатнă. Клуб пĕтĕмĕшлех юхăннă теме пулать. Пушă ларакан çурт ял илемне пĕтерет. Кунашкал ÿкерчĕке чылай ялта курма пулать паллах. Акă икĕ арçын лавккаран кĕленчепе тухрĕç те клуб айккине кайса черкке хыççăн черкке пушатрĕç. Пĕри нумай шутласа тăмарĕ, клуб хыçнелле кайса ыйха пусрĕ. Тепри вара пушă кĕленчене çавăнтах пăрахса хăварчĕ.
Культура çурчĕ ял халăхне савăнтармалли вырăн пулмалла. Хураварта пурăнакан эрех тусĕсемшĕн те çавăн пекех ахăр. Ял варринче лавккапа юнашарах вырнаçнă клуб яшсемпе хĕрсемшĕн яланах хупă. Пурнăç та çынна хытах улăштарать. Клубăн илемлĕ сăнĕ те юлман. Шалта та пушă. Ял çыннисем пĕлтернĕ тăрăх, çамрăксем темиçе çул каялла ташă каçĕсем ирттернĕ, унпа пĕрлех концертсем, спектакльсем кăтартнă. Халĕ вара тÿрех каламалла: çамрăксем малалла клуба тухса вăхăта усăллă та савăнăçлă ирттереймĕç. Клуб çуртне юсама, сăн кĕртме вара укçа-тенки те пайтах кирлĕ. Йывăç клуб кивелнĕ.
– Пухусем те çак клубра пулатчĕç. Халĕ вара пĕр-пĕринпе юнашар ларса калаçма ялта нимĕнле учреждени те çук, – пăшăрханăвне палăртрĕ пĕр ватă.
Ял çыннисем ĕçе каяс умĕн яланах клуб умне пуçтарăннă, ку вырăн хăйне евĕр центр шутланса тăнă.
Спектакль-концерт хатĕрленмелле-и – пултаруллисем пур кăмăлтан репетицисене çÿренĕ. Кашни каçах клубра шăв-шав тăнă. Хăй вăхăтĕнче кунта кино та кăтартнă. Шашкăпа шахмат вăййисене кăмăллакансем вара кун сиктермесĕр клуба пухăннă.
Шел те, паянхи клуб никама та хăйĕн патне илĕртеймĕ. Савăнăçлă та савăк вăхăтсем хыçа юлнă, купăс сассине те илтме пулмасть халĕ. Чуна пăшăрхантараканни вара темĕн чухлех. Клуб умĕнчи карниз йăтăнса аннă, çурт йĕри-тавра темĕн те пĕр выртать. Культура çуртне вăрăм курăк пусса илнĕ. Тахçан пурне те кирлĕ клуб çурчĕ халĕ юрăхсăра тухнă. Ял çыннисем ăна курмаççĕ тейĕн. Пушă та кивĕ çурт вара ял сăнне тĕксĕмлетет, ун умĕнче йăванса выртакан çÿп-çап чуна ыраттарать.
Вера МОРОЗОВА.