14 сентября 2011 г.
Питĕ тăрăшуллă, пултаруллă та çутă ĕмĕтлĕ хĕр ача вĕренет Ураскилт шкулĕнче. Вăл – Евгения Федорова, саккăрмĕш класра ăс пухать. Тÿрĕ те ăшă кăмăллă пулни тÿрех сисĕнчĕ. Ачасемпе хутшăнма, пуканесем валли кĕпесем çĕлеме, статья-заметкăсем çырма юратать. Женя вĕрентекенсене хăйĕн тăрăшулăхĕпе тахçанах тĕлĕнтерме пуçланă ĕнтĕ. Пур ĕçре те активлăхпа палăрать.
Акă иртнĕ вĕренÿ çулĕнче вăл районпа республика тата Раççей шайĕнче иртекен викторинăсемпе конкурссенче хутшăнса малти вырăнсем йышăнма пултарнă.
«Марс çинче те улмуççисем çурăлма пуçлĕç» ятпа районта иртнĕ конкурсра сăвă çырнипе палăрнă. Республика шайĕнчи «Чăваш кĕнеки» конкурсра активлă хутшăннăшăн ятарлă сертификата тивĕçнĕ. Хĕр пĕрчи пĕтĕм Раççейре ирттерекен викторинăра та çитĕнÿ тунă. Унта 300 ача хутшăннă. Историпе тата искусствăпа çыхăннă конкурсра Женя Федорова искусство енĕпе 20-мĕш вырăн йышăннă.
Евгения ыттисенчен сăвă тата заметкăсем çырас ăсталăхпа уйрăлса тăрать. Çавăнпах пулĕ унăн ĕмĕчĕ журналист пулассипе çуталса тăрать. Вăл вун пĕрмĕш класс пĕтернĕ çĕре вĕрентекенсем валли асăнмалăх сăвăсен кĕнекине хатĕрлесшĕн.
Ж.Федорова вĕренÿре лайăх паллăсемпе ĕлкĕрсе пырать. Унпа ашшĕпе амăшĕ, вĕрентекенсем мухтанаççĕ, кирлĕ вăхăтра пулăшу параççĕ.
А.СИЛИВЕСТРОВА.