21 сентября 2011 г.
Ĕçчен те правур ватăпа, нумай çул колхоз председателĕнче ĕçленĕ Василий Петрович Петровпа сăмах вакларăм.
Вăл 1931 çулта Кивкас-Юнтапа ялĕнче кун çути курнă. 7 çул шкул сукмакне такăрлатнă. 1945 çулта шкултан вĕренсе тухсан Калининăра пĕлÿ пухать, выльăх-чĕрлĕх тухтăрĕ пулса тăрать. Хыççăн виçĕ çул колхозра ĕçлет. Çар ретне тăрать, Архангельск облаçĕнче çĕр-шыв умĕнчи тивĕçне пурнăçлать. 1955 çулта салтакран килсен авланма шутлать. Вутлан ялĕнче çуралса ÿснĕ Тая хĕрпе пĕр çемье çавăраççĕ. Виçĕ «кайăк» пĕрин хыççăн тепри тенĕ пек вĕçсе килсе савăнтараççĕ мăшăра. Паянхи куна вĕсем кашниех çемьеллĕ ĕнтĕ.
Чи малтанах шоферта ĕçлет Василий Петрович. Пĕрлехи пухура халăх ăна колхоз ертÿçине суйлаççĕ. Çак йывăр лава вăл 16 çула яхăн туртса пырать. Василий Петрович хăй ĕçленĕ чухнехи колхоз пурнăçĕпе те паллаштарма килĕшрĕ.
Ĕçлекенсене шалу вăхăтра тÿленĕ «Звезда» хуçалăхра. Çĕнĕ стройка нумай тунă. Ял çынни çурт-йĕр е хуралтă çĕнетет-и, техникăпа тÿлевсĕр тивĕçтернĕ.
«Манăн ĕç укçи уйăхра 300 тенкĕ тухнă пулсан, ĕне сăвакансем 350-400 тенкĕ илетчĕç, – аса илчĕ Василий Петрович. – Çынсем пĕр-пĕрне пулăшнă, кар тăрса ĕçе пурнăçланă».
Хуçалăха ертсе пыма пăрахсан 9 çул ял совет председателĕнче вăй хурать. Кирпĕч заводĕнче те ĕçлет.
Августина СТЕПАНОВА.