24 сентября 2011 г.
Анчахрах-ха яваплăха туймасăр, пурнăçăн анлă çулĕпе çăмăллăнах утатчĕ Надя. Халĕ авă мăшăр, ача амăшĕ, кил хуçи хĕрарăмĕ те вăл.Мăн Кăканарта пурăнакан Надежда 1994 çлта Элĕк ене пĕрремĕш хут килнĕ. Аслă пĕлÿ илнĕ çамрăк специалиста направленипе шăпах çакăнта янă.
Хĕре шкулта тракторпа ĕçлекен Олег Медведев тÿрех асăрханă. Часах Тури Карачурара туй та кĕрленĕ. Çамрăк çемье малтанлăха ашшĕн килĕнчех пурăнать. Олегăн мăнаккăшĕн пÿртне юсасан, ытти хуралтăсене çĕклеме строительство материалĕсем туянсан Олегпа Надя урăх урама пурăнма куçаççĕ.
– Çав çулах выльăх-чĕрлĕх усрама çурт-йĕр турăмăр. Тепĕр çулхине мунча, лаç тăрăхне çĕклерĕмĕр. Хыççăн кирпĕчрен пÿрт те лартрăмăр, – терĕ çамрăк хĕрарăм.
Кил хуçи арçынĕ аякка ĕçлеме çÿрет. Киле килсе кайнă вăхăтра та ахаль лармасть Олег Никодимович, çынсем ыйтнипе чÿрече рамисем, алăксем ăсталать.
Кунашкал пултарулăх ăнсăртран палăрнă тесен те тĕрĕсех. Сарай хăпартсан чÿрече, алăк лартмалли кăна юлнă. Пĕрне пулăшма ыйтнă, теприне – ун патне пыма никамах та вăхăт çитереймен. Çапах та кÿршĕри арçын каярах çамрăка пулăшнă.
– Ĕçе пикентĕм, йăнăшсемсĕр пулмарĕ паллах. Хыççăн вара çын куçĕнчен питех пăхман, – савăнсах калаçрĕ Олег Медведев.
Кил хуçи арçын ĕçĕпе аппаланнă чухне ывăлĕсем амăшне пулăшаççĕ. Пахчара тимлемелле-и, выльăх-чĕрлĕхе пăхмалла-и – хаваспах ĕçлеççĕ ачисем. Пĕр-пĕрне ăнланса, килĕштерсе пурăннине мĕн çиттĕр; Çавна тĕпе хурса пурăнаççĕ те Медведевсем. Ахальтен мар пурнăçĕ те ăнать вĕсен. Килти хуçалăхĕнче пусранах пурлăх пухăнать.
С.СЕРОВА.