24 сентября 2011 г.
Кашни çыннăн тĕрлĕрен ĕмĕт. Камăн профессипе çыхăннă, камăн – телейлĕ пурнăçпа, пуянлăхпа çыхăнма пултарнă.Уйрăмах ача чухне, кĕçĕн классенче вĕреннĕ вăхăтра ĕмĕтсем чылай çуралаççĕ. Пĕри ак, космонавт, тепри сутуçă пулма ĕмĕтленет. Ача чухнехи ĕмĕт мĕн ÿссе çитичченех вăйра тăма пултарать.
Пĕр класра,
пĕр университетра вĕреннĕ
Шăпа çине çавăн пек çырнă-ши е хăйсем пĕр-пĕринчен уйрăлас мар тесе шутланипе çапла пулнă-ши; Кам пĕлет ăна; Кĕçĕн Тăван шкулĕнче вун пĕрмĕш класс таранах пĕрле ăс пухнă Алена Архиповăпа Татьяна Петрова халĕ уйрăлми тус-юлташсем. Вĕсем шкулта иккĕшĕ те питĕ лайăх вĕреннĕ. Шкулта тата районта иртекен конкурссемпе олимпиадăсене час-часах хутшăннă. Активлăхпа тата тăрăшулăхпа палăрнă. Паянхи кун та çавăн пекех. Аленăпа Таньăн вăй-халĕ çăл куç пек тапса тăрать. Пур çĕре те çитме ĕлкĕреççĕ.
Шкул саккинчен тухсан аслă пĕлÿ илме хулана туртăннă хĕрсем. И.Я.Яковлев ячĕпе хисепленекен университета вĕренме кĕнĕ. Алена физикăпа математика факультетĕнче математикăпа информатика специальноçне алла илнĕ. Таня вара психологипе педагогика факультетĕнче педагог-психолог профессине шĕкĕлченĕ. Вĕсем яланах пĕрле тĕл пулса шăкăл-шăкăл калаçса шкул вăхăчĕсене аса илкеленĕ. Ытти тусĕсемпе тĕл пулусем йĕркеленĕ. Студент чухне Аленăпа Таня университетра иртекен ăмăртусемпе тĕрлĕ уявсене хутшăннă.
Кашнинпе пĕр чĕлхе тупмалла
Хĕр-тантăшсем Шупашкарти 4-мĕш номерлĕ училищĕре вĕрентнĕрен яла тăтăшах çÿреймеççĕ. Çулла та хĕвел çинче пиçĕхсе выртма вăхăт çук вĕсен. Алена университетран вĕренсе тухсан таçта та ĕçлесе хăйне тĕрĕслесе пăхрĕ, анчах та учитель ĕçĕ çеç кăмăлне тивĕçтерчĕ. «Ачасемпех ĕçлеме лайăх, интереслĕ», – теççĕ кулкаласа çамрăксем. Çапла пулмасăр, училищĕре темĕнле ача та вĕренет. Ытларах учетра тăракансем е ăнăçсăр çемьере ÿссе тухнисем. Кашнинпех пĕр чĕлхе тупмалла. Кунта, паллах, Таня Петровăн витĕмĕ те пысăк вырăнта. Вăл ачасен кăмăлне тарăнрах курма тăрăшать. Преподавательпе тавлашакан ачасене педагог-психолог кирлех. Малтанхи çулхинех пикесене йывăр пулнă. Майĕпен ачасене хăнăхса çитнĕ, ачасем те вĕсене юратма пуçланă.
– Хамăрăн пурнăçа педагог профессийĕпе çыхăнтарнăшăн пĕрре те ÿкĕнместпĕр, – теççĕ Т. Петровапа А. Архипова. Вĕсем хăйсен ĕçне пĕлсе пурнăçлаççĕ.
Таня Кĕçĕн Тăвана Çурçĕртен пурăнма куçса килнĕ. Хăйĕн ашшĕн тăван ялне таврăннишĕн те чунран савăнать хĕр. Алена пек тус тупнишĕн вăл пĕрре те ÿкĕнмест. Ялан пĕрне-пĕри пулăшма хатĕр. Таня шкултан вĕренсе тухсан Петровсем амăшĕн ялне, Павлушкăне пурăнма куçаççĕ. Çапах çыхăну çухатмаççĕ хĕрсем.
Кăçал Таньăпа Алена Краснодар енчи Туапсе хулине канма кайса килчĕç. Унта юлташсен шутне татах та пысăклатрĕç. Нумай çĕнĕлĕх курчĕç. Ту çине те хăпарса курчĕç. Вăхăта сывлăхшăн та усăллă ирттерчĕç. Хаваслă кунсем нумаях тăсăлман, анчах та хĕрсем мĕн пур вăхăтпа пĕлсе усă курчĕç. Хула илемĕпе киленсе пурăнчĕç.
Аленăпа Таня училищĕре те, тусĕсем хушшинче те, ялта та пĕр пек. Вĕсем ялан савăнăçлă. Нихăçан та хăйсем куляннине, мĕнпе те пулин пăшăрханнине кăтартма тăрăшмаççĕ. Хуйха-суйха йăл-кулăпа ирттерсе яраççĕ.
А.СИЛИВЕСТРОВА.