28 сентября 2011 г.
Мăн Ямашри вăтам шкула пырса кĕнипе пĕрлех илемлĕ сăн-питлĕ çамрăк вĕрентекен куç тĕлне пулчĕ. часах паллашрăмăр: Ирина Германовна Ильдер пулчĕ ку. Физикăпа математикăна вĕрентекенскер, директорăн çумĕ те шутланать-мĕн.
Вăл кăçал вăтам шкулпа сывпуллашакансем çине савăнса пăхать. Часах пурнăçăн анлă çулĕ çине тухакансене вĕрентсе воспитани панă çĕрте унăн тÿпи те пур-çке.
– Хамăр тăван ачасем пекех çывăх вĕсем пире. Вĕренÿре ĕлкĕрсе пырсан, çитĕнÿ тусан чунра та лайăх, – палăртрĕ Ирина Ильдер.
Вăл вĕренекенĕсемпе яланах çыхăну тытма тăрăшать. Вĕсем те ăна манмаççĕ, уявсем ячĕпе салам сăмахĕсем çитереççех. Ирина Германовна предметне кăмăлланăранах шкул хыççăн физика тата математика енĕпе пĕлĕве малалла ÿстерекенсем çук мар.
Тури Выла хĕрĕ Ураскилтри вăтам шкул хыççăн Чăваш патшалăх педагогика институтне кайса кĕнĕ. Пилĕк çул тăрăшса вĕреннĕ хыççăн, алла диплом илсен, направленипе Мăн Ямаш шкулне лекет Ирина. Çамрăк хĕре кунта кăмăлпах йышăннă.
Директорăн хуçалăх енĕпе ĕçлекен çумĕ Владимир куç хывнă Тури Вылă хĕрĕ çине. Ильдерсем халĕ пĕр-пĕрне чун-чĕререн парăннă мăшăрсем. Тăватă ача пăхса ÿстереççĕ вĕсем.
Мăшăрсем пыл хурчĕсем ĕрчетессипе те пултаруллă.
Елена ТИМОФЕЕВА.