28 сентября 2011 г.
Тăван çĕр-шывăн Аслă вăрçине хутшăннисен шучĕ çулран çул чакса пырать. Çавăнпа та вĕсем çине тивĕçлипех тимлĕх уйăрмалла пек. Патшалăх ку тĕллевпе ветерансене тĕрлĕ çăмăллăх парать. Кил-çурта çĕнетме, хваттер туянма укçа-тенкĕ енчен пулăшу кÿрет. Анчах та асăннă саккуна тĕпе хуманнисем, ăна пăсакансем те тĕл пулаççĕ.
Сергей Егоров 1924 çулта Сурăмпуç-Шĕмшеш ялĕнче çуралса ÿснĕ. Унтах пурăнать. Вăл пурăнакан çурта 1966 çулта тунă. Çулсем иртнĕ май самях кивелнĕ.
2011 çулхи кăрлачăн 11-мĕшĕнче вăрçă инваличĕ пурăнмалли кил-çурт условийĕсене лайăхлатма Шĕмшеш ял тăрăхĕн администрацийĕнчен пулăшу ыйтнă. Кăçалхи нарăс уйăхĕн вун пĕрмĕшĕнче ăна вырăнта учета илнĕ.
Анчах та каярахпа Шĕмшеш ял тăрăхĕн администрацийĕ С.Е.Егорова кил-çурт тивĕçтерессипе нимĕн те туман. Çурт-йĕре лайăхлатас тĕллевлисен списокне те кĕртмен. Çавăнпа Шĕмшеш ял тăрăхĕн пуçлăхĕ çине представлени çырма тиврĕ. Асăннă представлени çине ертÿçĕ çийĕнчех хурав пачĕ. С.Е.Егорова пурăнмалли çурт-йĕрпе тивĕçтерме хирĕçленин сăлтавĕ – ведомствăсем хушшинчи комиссин икĕ членĕ алă пусса паманни.
Район прокуратури вăрçă инвалидне пурăнмалли кил-çурта лайăхлатса парас тĕллевпе çитĕлĕксĕр ĕçленине тата асăннă çитменлĕхсене пĕтерсе С.Е.Егорова черете тăратмаллине палăртса суда тавăçпа тухрĕ.
Красноармейски район сучĕ 2011 çулхи çурла уйăхĕн 30-мĕшĕнчи йышăнупа тавăçа тивĕçтерчĕ.
Валерий ШОРКИН, район прокурорĕ.