05 октября 2011 г.
Шăлан ялне пырса кĕрсен кампа сăмах ваклама пулать-ши тесен мана тÿрех пĕр пĕчĕк, 2 ватă пурăнакан пÿрт çине кăтартрĕç.Эпĕ пырса кĕнĕ чухне иккĕшĕ те крыльцара ларатчĕç. Кĕтесре – тĕрлĕ чей курăкĕ. Хăйсем хатĕрленине çеç ĕçеççĕ иккен ватăсем.
Дарья Емельяновна Емельянова пурнăçĕпе паллаштарма пуçларĕ. Унăн аппăшĕ – Анфиса Емельяновна 1926 çулта, çак ялтах кун çути курнă пулсан, вăл хăй аппăшăĕнчен 9 çул каярах çуралнă. Çапах та вăрçă умĕнхи выçлăх нушине аванах тутанаççĕ.
Хуçалăхра вăй-халне шеллемесĕр ĕçлеççĕ. Темле пулсан та шкул сукмакне такăрлатса кураççĕ пĕртăвансем.
Дарья Емельяновна Шăлан каччипе çемье çавăрать. Упăшки вилнĕ хыççăн, ача-пăча пулманран, пĕчченех тăрса юлать. Анфиса Емельяновна та çемьеллĕ пулать. Аппăшĕ пекех тăлăха тăрса юлать пулин те пĕртен пĕр хĕр-пĕрчине ура çине тăратма вăй-хал çитерет.
Малтанах Брянск хулинче хĕрĕпе пĕрле пурăнать кинемей. Юлашки виçĕ çул вара йăмăкĕпе чăх-чĕп, сурăхсем тытаççĕ. Мĕн пур анкарти уттине, 40 сотăя яхăн, алăпах çулса типĕтсе кĕртеççĕ. Ĕнине кăçал çуркунне сутса янă. Кунĕн-çĕрĕн кăштăртатаççĕ Емельяновсем. Пĕр ĕç хыççăн теприне пурнăçлаççĕ. Пĕчĕккĕн пурнăç урапине кустарса пыраççĕ.
«Çулсем хăйсеннех тăваççĕ. Утайми пулсан пăхакан çукки пăшăрхантарать», – пусăрăнчăк кăмăлпа калаçрĕç ватăсем.
А.СТЕПАНОВА.