16 ноября 2011 г.
Кашни йĕркеллĕ çынах телейлĕ те нумай çул пурăнма ăнтăлать. Пурне те тума пултаратпăр-и-ха эпир çак тĕллеве пурнăçлама; Шел те, пирĕнтен чылайăшĕ пушă вăхăта телевизор умĕнче ларса ирттерет, компьютер вăййисемпе айкăшать... Çав хушăрах вăхăта хăвăн сывлăхушăн усăллă ирттерме те пулать вĕт-ха.
Акă Тавăт ял тăрăхĕнчи Кĕçĕн Тăванти çамрăксем канмалли кунсенче япăх çанталăка пăхмасăрах футболла выляççĕ. Сăмах май, ку çивĕч те интереслĕ вăйăсене каччăсемпе пĕрлех хĕрсем те хутшăнаççĕ. Ытти кунсенче каçсерен теннисла та выляççĕ. Пуçламăш классенче вĕренекенсем кашни ирех уроксене вăй-хал хусканăвĕсенчен пуçлаççĕ. Ачасемпе пирус туртнин, наркотиксемпе иртĕхнин, эрех-сăра ĕçнин сиенĕ çинчен калаçусем ирттереççĕ. Çапла вара сывă пурнăç йĕрки патне кунсерен утăм хыççăн утăм хывăнать.
Г.ПЕТРОВ.