19 ноября 2011 г.
Е. Александрова Юнтапари вăтам шкулта аслă вожатăйра ĕçлет. Хăй вăл хамăрпа кÿршĕллĕ Красноармейски районĕнчи Йĕпрем ялĕнчи нумай йышлă çемьере çуралса ÿснĕ.
Педагогика «отраслĕнче» Елена Александровна – паллă çын. Ара, 5 шкулта ĕçлесе самай опыт пухнă вĕт-ха вăл, çывăх çыннисем хушшинче – вуншар ĕçтешĕ тата çĕршер вĕренекенĕ.
Илемлĕ, кăмăллă, пуринпе те калаçма хавас... Кун çумне татах та татах хушса калама пулать. Чи малти вырăнта вара – ачасемпе пĕр чĕлхе тупма пĕлни. 2003 çултанпа Елена Александровна – Юнтапа шкулĕнчи пуçламăш классен вĕрентекенĕ. Хăйĕн çăмăл мар тивĕçне чунтан парăнса пурнăçлать вăл. Çавăнпа хисеплеççĕ те ăна ĕçтешĕсем, юратаççĕ вĕренекенĕсем, ырă сунаççĕ ашшĕ-амăшĕсем.
З.СТЕПАНОВА.