21 января 2012 г.
Иртсе пыракан ĕçлĕ кунсенче ертÿçĕсен халăхпа канашламалли, граждансен вĕсенчен ыйтса пĕлмелли нумай. Йăлана кĕнĕ Пĕрлехи информаци черетлĕ кунĕнче Вутланпа Татмăш ялĕсенче пурăнакансем вĕрентекенсемпе пĕрле кунти шкула пуçтарăнчĕç. Районтан килнĕ ултă çынран тăракан ушкăнра яваплă ĕçсенчи сумлă ертÿçĕсем. Вĕсем халăха интереслентерекен нумай ыйтусем çине анлă хуравсем пачĕç.
Кăçалхи пуш уйăхĕн 4-мĕшĕнче Раççей Федерацийĕн Президенчĕн суйлавĕ пулать. Çĕр-шывшăн политика пысăк пĕлтерĕшлĕ çак ĕç-пуçа еплерех хатĕрленсе ăнăçлă ирттересси çинчен Чăваш Ен финанс министрĕн çумĕ В.Н.Иванов тата район пуçлăхĕ – депутатсен Пухăвĕн председателĕ – В.Х.Дубинин тĕплĕн каласа кăтартрĕç, пухăннисене çитес суйлавра активлăх кăтартма сĕнчĕç.
Районти ял хуçалăх предприятийĕсен иртнĕ 2011 çулхи çитĕнĕвĕсемпе управлени пуçлăхĕ А.И. Прохоров паллаштарчĕ, вырăнта епле ĕçлени çинчен Ехремкасси ял тăрăхĕн ертÿçи В.М.Ефимов каласа кăтартрĕ.
Тивĕçлĕ канăва тухнисене ытларах пенси ыйтăвĕсем, чылайăшне Чăваш Ен Пуçлăхĕн Михаил Игнатьевăн иртнĕ çул вĕçĕнчи ĕç ветеранĕсем пирки калакан Указĕ кăсăклантараççĕ. Районти пенси фончĕн пуçлăхĕ С.Ю.Воробьев тата социаллă хÿтлĕх пайĕн ĕçченĕ Ф.Г.Трофимова 2012 çулта ку енĕпе пурнăçлама палăртнă çĕнĕлĕхсем çинче чарăнса тăчĕç.
Çак кунах информаци ушкăнĕ Вăрманкас ялĕнче пурăнакансемпе те тĕл пулчĕ.
А.ИВАНОВ.