28 января 2012 г.
Элĕкри ача-пăча искусство шкулĕнчи музыка уйрăмĕн фортепиано класĕнчи преподавательсем класс тулашĕнчи мероприятисене пысăк тимлĕх уйăраççĕ. Уроксенче яланах концертсем пулаççĕ. Пĕрле вĕренекенсем, ашшĕ-амăшĕсем умĕнче юрласа-ташласа кăтартни çамрăк мусăкçăсен кăмăлне çĕклет. Анчахрах музыка уйрăмĕн фортепиано класĕнче вĕренекенсем (преподавателĕ Н.Павлова) «Вĕренекене – ăнăçу, вĕрентекенне – савăнăç» ятпа иртнĕ ашшĕ-амăшĕсен пухăвне хутшăннă. Пуху Элĕкри И.Я.Яковлев ячĕллĕ пĕтĕмĕшле вăтам шкулти 4-мĕш класра иртнĕ. Музыка уйрăмĕнчи 2-мĕш класра вĕренекен Дарья Семенова хăйĕн программипе хатĕрленĕ концерт кăтартнă. Репертуарта тĕрлĕ композиторсен музыка хайлавĕсем пулнă: А.Гедикен «Этючĕ», Т.Назарован «Вариацийĕсем», В.Золотарев йĕркеленĕ «Ой, лопнув обруч» композици. Даша шкулти, районти тата республикăри мероприятисене хастар хутшăнать. Хальхинче те вăл пĕр класра вĕренекенсем умĕнче хăйĕн пултарулăхне туллин кăтартнă.