24 марта 2012 г.
Тимĕре хĕрнĕ чухне шаккаççĕ тенĕрен Кĕçĕн Тăван ялĕнчи «Тăванлăх» пултарулăх ушкăнĕ тăрăшса хатĕрленĕ концертпа юнашар ялсене те çитсе килчĕ. Вырăнти артистсем иртнĕ эрнере Хирлеппуç тата Тени ялĕсенче хăйсен пултарулăхĕпе халăха савăнтарчĕç. Сергей Андреевпа Константин Гаврилов водительсем пулăшнипе ялсене çÿрес чăрмав пулмарĕ.
Куракансем аслисем (ертÿçи – Н.Иванова) тата ачасен (ертÿçи – К.Платонова) ытарайми ташшисене чун-чĕререн йышăнчĕç. Пĕрремĕш класри Алиса Григорьева «Пукане» юрра ăста шăрантарчĕ. С.Петрова, Д.Андреева, Н.Платонова тата пĕрремĕш класри Даниил Владимиров лартнă шÿтсем курма пынисене хавхалану кĕртрĕç.
В.Гладков баянист ăсталăхпа палăрчĕ. Пĕчченшер юрланă юрăсем те килĕшрĕç.
Виктор МИХАЙЛОВ.