14 апреля 2012 г.
– Çÿхерех хуллине илсе пар-ха мана, – сăмах хушрĕ кинемей хăйĕнчен инçех мар ларакан мăшăрне.
– Галина, çак хушша хулăмрах хуллине ярас пулĕ. Ун пек çирĕпрех пулать, – чĕнчĕ арçын.
Кирек епле ĕçе те пĕрле пурнăçлама тăрăшаççĕ Уйкас ялĕнчи Пантелеймон Николаевич Николаевпа Галина Алексеевна Андреева. Кил хуçи арçынĕ лăпă маçтăрлать пулсан, çемье управçи карçынкка çыхать. Кашниех çийĕнчех пĕр-пĕрин ĕçне хак параççĕ, çитменлĕхсене асăрхаттараççĕ.
Ĕç тунă чухне вара калаçу тĕрлĕ темăпа йĕркеленет.
Аслă ăрури ватăсем ĕмĕре пĕрле пурăнса ирттернĕ тейĕн. Пĕр-пĕрне куçран пăхсах ăнланаççĕ.
– Мăшăр пурнăçран ирех уйрăлчĕ. Арçын пуççăн кил хуçалăха тытса пыма йывăр. Çавăнпа тепре авлантăм, – терĕ 76-ри арçын.
Пантелеймон Николаевич хăй вăхăтĕнче ялта хисеплĕ механизатор шутланнă. «Сельхозхими», «Сельхозтехника» предприятисен тытăмĕнче виçĕ теçеткене яхăн тимленĕ. Пĕтĕмĕшле ĕç стажĕ 43 çул.
– Иккĕмĕш мăшăрпа тăвансем паллаштарчĕç. Çĕнĕ Шупашкартан вăл, – пĕлтерет арçын.
Галина Алексеевна Пантелеймон Николаевичпа паллашнă чухне пĕчченех пурăннă. Упăшки вилнĕ хыççăн килти хуçалăх лавне хăй тĕллĕн туртнă.
– Халĕ вун икĕ çул пĕрле, – калаçăва хутшăнать 71-ри кинемей.
Карçынкка-лăпă çыхас пуçару шăп та шай Г.Андрееван шухăш-тĕллевĕ пулнă. Пĕрремĕш упăшкин çемйинче карçынкка çыхассипе ĕçленĕ.
– Карçынккапа лăпă çыхса пысăк тупăш ĕçлесе илессишĕнех тăрăшмастпăр. Çынсемшĕн усăллă япаласем туни пĕлтерĕшлĕ, – ăнлантарать çичĕ теçеткерен иртнĕ ватă.
Манпа калаçнă вăхăтрах пĕрин хыççăн тепĕр хăва хуллине авать. Кил таврашĕнче ĕçсем çук пулсан кунне тăватă-пилĕк карçынкка нимĕн те мар çыхать аслă ăрури çын.
– Хăва хулли шыраса Торпкассине çитиех каятпăр. Кĕркунне çителĕклĕ хатĕрлетпĕр те çавăнпа хĕл каçатпăр, – ĕç-хĕлпе паллаштарать Пантелеймон Николаевич.
Çемье карçынкка маçтăрлассипе вун икĕ çул ĕçлет пулсан, лăпă çыхассипе икĕ-виçĕ çул çеç тимлеççĕ.
Хĕрарăм алли çыпăçуллă пулни пÿрте кĕрсен те тÿрех сисĕнет. Урайĕнче Галина Алексеевна çыхнă палассем.
– Кивĕ япаласене çĕтсе çекĕлпе çыхса сăн кĕртетĕп. Килте кирлĕ усăллă япаласем маçтăрлатăп, – ăнлантарать кил управçи.
Çавăн пекех тĕрлĕ йышши илемлĕ тапочки, алсиш та çыхма ăста çичĕ теçеткерен иртнĕ ватă.
Капăрлатса çыхнă япалисене ачисене парнелет. Пантелеймон Николаевичăн вĕсем 5-ĕн пулсан Галина Алексеевнăн виççĕн.
К.ВАНЮШИНА.