25 апреля 2012 г.
Юр ирĕлсе пĕтнĕ май ĕçсем хушăнсах пыраççĕ: тавралăха çÿп-çапран тасатмалла, çамрăк йывăçсен турачĕсене иртмелле тата ытти те.Федераллă казначействăн Чăваш Республикинчи управленийĕн пай начальникĕ Николай Андреев пĕр кунхине çапла сĕннĕ: Элĕкри культурăпа кану паркĕнче йывăç-тĕм лартар мар-и; Ара пархатарлă ĕçрен кам-ха пăрăнма хирĕçлĕ; Казначейство ĕçченĕсем тÿрех килĕшнĕ, кану паркне çул тытнă. Тĕрĕссипе, вĕсем темиçе çул каялла лартнă хăш-пĕр йывăçсем çын кĕлетки çÿллĕш те çĕкленнĕ ĕнтĕ. Анчах çÿлелле каяйманнисем те пур: пĕрисене сăтăрçăсем хуçнă, теприсем вăй илеймен. Çавăнпа ăшă та хĕвеллĕ кунра йывăç-тĕм лартма йышпа тухрĕç. Хурăнсемпе хырсем йышăнакан территорие тасатма та ÿркенмерĕç.
Казначейство ĕçченĕсем çу каçипех культурăпа кану паркĕнчи çамрăк хунавсене пăхса тăма тĕллев тытрĕç.
К. ПЕРОВ.
Ÿкерчĕкре: хыр лартаççĕ.