04 мая 2012 г.
Нумаях пулмасть Муркаш районĕнчи Нискасси шкулне Етĕрне, Муркаш тата Элĕк районĕнчи шахмăта юратакансем пухăнчĕç. Çак тăрăхра çуралса ÿснĕ, халĕ Шупашкарта ĕçлесе пурăнакан В. Пастухов йĕркеленĕ шахмăтçăсен фестивалĕ иртрĕ. Элĕк районĕнчен вăййа В.Ефимов (Ехремкасси), А.Степанов (Элĕк), Б.Кириллов (Мăн Вылă), А.Иванов (Элĕк), А.Дмитриев (Чăваш Сурăм), З.Федоров (Элĕк), В.Филиппов (Элĕк шкулĕ) хутшăнчĕç.
Ăмăрту йĕрки тăрăх пĕр районти шахмăтçăсем пĕр-пĕринпе вылямарĕç. Пĕтĕмĕшле çичĕ тур иртрĕ. Пĕрремĕш вырăна Ю.Шаров (Нискасси) йышăнчĕ, иккĕмĕшĕ – В.Пастухов (турнир спонсорĕ) пулчĕ, анчах вăл хăйĕн парнине Б.Кириллова пачĕ. Виççĕмĕш вырăна Элĕкри А.Степанов йышăнчĕ.
Командăсем хушшинче Муркашсене çитекенни пулмарĕ. Элĕксемпе Етĕрнесем иккĕмĕшпе виççĕмĕш вырăнсене тухрĕç.
Блиц-турнирта Элĕксем 6 очко пухса çĕнтерÿçĕ пулса тăчĕç.
З.ФЕДОРОВ,
«е2-е4» клубăн президенчĕ.