06 июня 2012 г.
Çĕртме уйăхĕн пĕрремĕш кунĕ икĕ хаваслă пулăмпа палăрса тăрать: çу пуçланнипе тата Пĕтĕм тĕнчери ачасене хÿтĕлемелли кун пулнипе.
Çав ятпа Элĕкри культурăпа кану центрĕнче ачасен уявĕ иртнĕ. Унта Элĕкри вăтам шкулта вĕренекенсем, Мăн Вылăри культурăпа кану центрĕнчи, Шĕмшешри информаципе культура центрĕнчи ачасен тата патриотсен «Ăмăрт-кайăксем» клубĕн членĕсем хутшăннă. Уявра хаваслă юрăсем шăраннă, ачасем ташăсем ташланă, вăйăсем вылянă, конкурссенче тупăшнă. Пурте «Илемлĕ çулла» конкурсра ÿкерчĕксем ÿкернĕ. Мăн Вылăран килнĕ «Микс» ушкăн çĕкленÿллĕ ташăсемпе хавхалантарнă, Катя Большова, Валерия Лазарева, Настя Архипова, София Иванова янăравлă та уçă сассисемпе тыткăнланă. Юлия Леонтьевăпа Настя Дубинина чăваш наци çипуçĕпе питех те капăр курăннă.
В.ГЕННАДЬЕВ.