30 июня 2012 г.
Çул çинчи пăтăрмахсене нумай çын лекет, вĕсен хушшинче шкул çулне çитмен ачасем те сахал мар. Пĕчĕкскерсем инкеке çакланасран асăрхаттарас тĕллевпе Тавăтри ача садĕнче ĕçлекенсем шăпăрлансене çул-йĕр правилисемпе кулленех паллаштараççĕ. «Светофорик» конкурса та тĕплĕн хатĕрленетпĕр.Ачасем валли вăйăсем, тĕл пулусем, ÿкерчĕксен куравĕсем йĕркелерĕмĕр. Пире çак конкурса хатĕрленме ача садĕнче ĕçлекенсем кăна мар, ашшĕ-амăшĕсем те пулăшрĕç. «Цветик-семицветик» ушкăна çÿрекен 4-7 çулхи ачасемпе «Çул-йĕр азбуки» спорт мероприятийĕ, «Эпĕ çулçÿревçĕ» экскурси, тĕрлĕрен калаçусем ирттерсе çул-йĕр правилисене пĕлнине çирĕплетрĕмĕр.
Ачасемпе садик ĕçченĕсем çул-йĕр хăрушсăрлăх инспекцийĕн инспекторĕпе Константин Прокопьевпа тĕл пулчĕç. Вăл çул-йĕр правилисене пурин те пĕлмеллине, ачасене ку енĕпе садикре кăна мар, килте те паллаштармалли çинчен каларĕ, курăмлă ÿкерчĕксемпе çул çинчи паллăсене кăтартрĕ. Вăл е ку йĕркене пăхăнмасан инкек патне çитме пултарассине ăнлантарчĕ.
Л.ПЕТРОВА,
А.СКВОРЦОВА,
Тавăтри «Пучах» ача сачĕн воспитателĕсем.