01 сентября 2012 г.
Хĕрарăм чун-чĕри тÿсĕмлĕ, çав вăхăтрах çепĕç те сисĕмлĕ. Чăтăмлăх, чун хавалĕ, киленÿ пулмасан хитре тĕрĕсем тăваймăн. Эренар ялĕнчи Литиния Никифорова чечексене чĕрĕлĕх кĕртет.Тĕрлеме юратакансем çекĕлпе çыхма кăмăллаççĕ. Литиния Григорьевнăна ку ĕçе çывăх тăванĕ хăнăхтарнă. Тĕрĕллĕ тата чĕнтĕрлĕ япаласене типтерлĕ вырнаçтарнă пÿрт ăшчикки питех те илемлĕ. Стенасенчи рамăсем ăшне «хупнă» илĕртÿллĕ чечексем кил хуçисене, килекен-каякансен чунĕсене ырăлăх кĕртеççĕ, кăмăла çĕклеççĕ вĕсем. Тĕрĕ ăсти чылай хĕрарăмсене тутăр тĕрлесе панă. Фермăра пăрусем пăхнă вăхăтра та, больницăра санитаркăра, шкулта техничкăра ĕçленĕ чухне те чун туртнă ĕçĕпе аппаланма вăхăт тупнă. Халĕ те алла йĕппе çип тытмасăр пултараймасть Литиния Никифорова. Художник тĕрлĕ сăрăсемпе ÿкерчĕк тăвать пулсан, вăл вара пусма çине эрешлет.
– Вĕтĕ чечексем тĕрленĕ тутăр – манăн малтанхи ĕç. Ăна чи хаклă япала вырăнне хурса хаклаттăм. Хамăн алăсемпе ăсталанă пысăк япаласем – сĕтел çивиттипе стена çине çакмалли кавир, – каласа парать ал çиччĕри тĕрĕ маçтăрĕ.
Лина тесе чĕнеççĕ ăна ялта. Вăл çынна пулăшма яланах хатĕр.
Литиния Григорьевнăпа Николай Георгиевич пиллĕк ача çитĕнтернĕ. Оксана хĕрĕ те амăшĕ пекех ал ĕçне кăмăллать.
А.ЗАХАРОВА,
Тени ял тăрăхĕн пуçлăхĕн çумĕ.