05 сентября 2012 г.
Хаваслă сăн-пит, чĕрĕ чечексен çыххисем, кăмăла çĕклекен юрă – çапла кĕтсе илчĕ сентябрĕн 1-мĕшĕнче Вутлан шкулĕ хăйĕн вĕренекенĕсемпе вĕрентекенĕсене, ашшĕ-амăшĕсене.Шкул ачисем класăн-класăн йĕркеленсе тăраççĕ. Пуçласа шкула каякан ачасемпе пĕрле ашшĕ-амăшĕ те пур. Пĕлÿ кунĕ ячĕпе савăнăçлă митинг уçăлнине пĕлтереççĕ. Шкул директорĕ Л.Никандрова сăмах илет.
– Сире пурне те Пĕлÿ кунĕ ячĕпе чун-чĕререн саламлатăп. Çĕнĕ вĕренÿ çулĕнче лайăх паллăсемпе кăна вĕренсе пымалла пултăр. Ăнăçу пĕтĕмпех хăвăртан килет, – терĕ вăл.
Директор лайăх вĕренекенсене Хисеп грамотипе чысларĕ.
Район пуçлăхĕ – районти депутатсен Пухăвĕн председателĕ В.Дубинин ачасене учительсене яланах тимлĕ итлеме, куллен пĕлÿ патне ăнтăлма ырлăх-сывлăх сунчĕ. Ехремкасси ял тăрăхĕн пуçлăхĕ В.Ефимов, педагогика ĕçĕн ветеранĕ, Вутлан шкулне нумай çул ертсе пынă А.Ананьев тата ыттисем те шкула пухăннисене Пĕлÿ кунĕпе ăшшăн саламларĕç.
Кăçал Вутлан шкулне пĕрремĕш класа 5 ача килчĕ. Пĕрремĕш урок спорт çăлтăрĕсене халалласа иртрĕ.
Анатолий ГОРШКОВ.