12 сентября 2012 г.
Йăлкăш шкулĕ çумĕнчи «Çеçпĕл» ача-пăча пахчинче халĕ кунĕпех ачасен хаваслă сасси илтĕнет. Шăпăрлансем çуллахи каникул вăхăтне килĕсенче ирттернĕ пулсан, паян акă воспитательсемпе тата тантăшĕсемпе пĕрле.Шкул çулне çитменскерсене ача пахчинче питех те интереслĕ. Вĕсем валли мĕн тĕрлĕ тетте çук-ши; Пуканесем, машина-трактор – пурте илĕртÿллĕ. Ачасене вĕрентмелли пособисем те куç умĕнчех.
Пÿлĕмсенче – кăмăла çĕклекен ÿкерчĕксем. Ăмăр çанталăкра ачасем тула тухмаççĕ, вăхăта шалта ирттереççĕ.
Ача пахчинче паянхи кун виççĕн ĕçлеççĕ. Валентина Иванова, Инна Федотова воспитательницăсем тата вĕсене пулăшаканĕ Алевтина Павлова шăпăрлансем патĕнчен кунĕпе те уйрăлмаççĕ. Ачасене вулама, çырма вĕрентесси те тĕп тĕллевсенчен пĕри пулса тăрать.
Куллен кунта çичĕ ялтан килеççĕ. Пĕчĕккисем валли условисем çителĕклĕ.