16 сентября 2013 г.
Нумаях пулмасть вуннăмĕш класра вĕренме пуçларăмăр. Çуллахи каникула
тантăшсем усăллă та интереслĕ ирттернĕ. Пĕрлехи патшалăх экзаменĕн çирĕп
тĕрĕслевĕ витĕр кашниех тухнă. Экзаменсене пурте япăх мар тытнă, анчах та 17
ачаран 8-шĕ вĕренĕве Чăваш Сурăмĕнчи вăтам шкулта тăсма шутламан, тĕп хулана
пĕр-пĕр професси пĕлĕвĕ паракан вĕренÿ учрежденийĕсене кайнă.
Вуннăмĕш класра ăс пухакансемшĕн В.Арсентьева ырă тĕслĕх. Тантăшпа пĕрремĕш
класранпах пĕрле пĕлÿ илетпĕр. Венера вара халĕ те вĕренÿре чи малтисен йышĕнче.
Вăл пĕрлехи патшалăх экзаменĕсене пĕтĕмпех пилĕк паллăпа тытрĕ. Математика,
вырăс, чăваш чĕлхисемпе, биологи предмечĕсемпе чи пысăк балсем пуçтарчĕ.
Çамрăк вăл е ку темăна ăнлантарнă чухне усă курнă пособипе тата кĕнекепе кăна
çырлахмасть. Пысăкрах, анлăрах информаци илессишĕн ытти хушма литературăна та
вулать, Интернетра çĕннине, кăсăклине тупать. Юлташĕсене те пулăшать. Ытлашши
сăмах вакламанни, шутласа калаçни Венерăн сăпайлăхне татах та ÿстерет. Лайăх
вĕренекенскер районта шкул ачисем хушшинче иртекен ăслăлăх конкурсĕсенче те
палăрать. 10-мĕш класс хĕрачи чупас енĕпе шкул командинче тăрать.
Евгений АЛЕКСАНДРОВ,
Чăваш Сурăм шкулĕ, 10-мĕш класс.