11 октября 2016 г.
Кĕркунне - çулталăкăн чи илемлĕ вăхăчĕсенчен пĕри. Çут çанталăкпа киленнисĕр пуçне çĕнĕ ĕмĕт-шухăш çуралать. Районти художество пултарулăх ушкăнĕсемпе клуб пĕрлешĕвĕсем иртнĕ кĕçнерникун Элĕкри культура çуртĕнче пултарулăх сезонне «Кĕркунне çулçă ÿксен» ятпа пуçларĕç.
Район çыннисем вĕсен юрри-ташшипе киленме кашни çулах йышлăн пухăнаççĕ. Пысăк та интереслĕ концерт йĕркелесси пĕр кунта пулакан ĕç мар. Тĕрлĕ организаци-предприятире тăрăшакансем кăнтăр апачĕ вăхăтĕнче е ĕç хыççăн культура çуртне репетицие васканине те асăнса хăварма кăмăллă. Пĕтĕмпех халăхшăн, канăва усăллă ирттерессишĕн. Кĕрхи уява чи пĕчĕккисем, «Топотушки» ташă ушкăнĕн артисчĕсем пуçларĕç. Пĕчĕкскерсем халăх ташшипе пурне те тыткăнларĕç. Çак ушкăна çÿрекен аслăрах çулхи хĕрсем те илемлĕ ташăсемпе сцена çине тухрĕç. «Росинка» экологи клубĕн сценкисем килĕшнине залра ларакан халăх алă çупса çирĕплетрĕ. Людмила Андреевăн сăввине итлеме те питĕ кăмăллă пулчĕ. Концертра «Валинкке» фольклор ушкăнĕ тата «Ветеран» халăх хорĕ, «Рябинушка» ташă ушкăнĕ хăйсен пултарулăхĕпе савăнтарчĕç. Куракансем тăвăллăн алă çупса Инна Афанасьева, Алена Михайлова, Сергей Иванов, Людмила Андреева, Нелли Львова, Валерия Лазарева, Ксения Суранова пултарулăхне пысăк хак пачĕç. Алексей Якимов хăйĕн пĕчĕк купăсĕпе пурне те илемлĕ кĕвĕ-çемĕ парнелерĕ.
Артистен пултарулăхĕ чăннипех те иксĕлми. Артем Алексеевпа Дарья Ефимовăн, «Ветеран» халăх хорне çÿрекен Владимир Уледеровăн ташшисем тыткăнларĕç, «Росинка» экологи клубĕн хастарĕсен Мария Никитинăпа Оля Семеновăн юррисем чуна пырса тиврĕç. Концерт «Элĕк ен» эстрада ушкăнĕн юррисемпе вĕçленчĕ.
Юрра-ташша кăмăллакансене пурне те хапăл туса йышăнатпăр. Элĕкри культура çурчĕн алăкĕсем пурин валли те уçă. Çĕнĕ сезона çутă ĕмĕт-тĕллевпе пуçларăмăр.
Иван НИКИФОРОВ.