21 октября 2016 г.
Ĕç çыннин çулталăкне халалласа Элĕкри тĕп библиотека Чăваш Республикин Наци библиотеки ирттерекен «Профессисен халăх энциклопедийĕ» акцие хутшăнать. Унăн тĕп тĕллевĕ - чи лайăх ĕçлекен çынсене тупса палăртасси, çитĕнсе пыракан ăрăва ĕçе юратма хăнăхтарасси.
Акци темиçе тапхăрпа иртет. Чи малтанах районсемпе хуласенче профессипе чи лайăх ĕçлекенсене тупса палăртаççĕ. Акцие пирĕн районтан та хутшăнаççĕ. Ехремкасси ял библиотекин тĕп библиотекарĕ Алина Андреева Качалав ялĕнчи Тимофей Трофимов механизатор тата Элĕкри тĕп библиотекăра тăрăшакан Зоя Удякова Асамат ялĕнчи педагогика ĕçĕн ветеранĕ Валентина Михайлова çинчен видеофильмсем ÿкернĕ. Иккĕмĕш тапхăрта вулавăшсенче тата вĕренÿ учрежденийĕсенче тĕл пулу иртет. Акци тĕрлĕ чи лайăх професси çыннисене тупса палăртма, вĕсен ĕçне пысăк хак пама, çамрăксемпе профориентаци ĕçне ирттерме пулăшĕ.