21 октября 2016 г.
Çитĕнекен ăрăва çирĕп те тарăн пĕлÿ парассишĕн, вĕсен тавракурăмне, ăс-хакăлне ÿстерессишĕн шкулсенчи педагогсемпе пĕрлех хушма пĕлÿ паракан вĕренÿ учрежденийĕсен вĕрентекенĕсем те сахал мар тăрăшаççĕ. Районти шкулсемпе Элĕкри ачасемпе çамрăксен пултарулăх центрĕ хушшинче çирĕп çыхăну йĕркеленнине палăртма кăмăллă. Çулсеренех асăннă центр çумĕнче ĕçлекен кружоксене вĕренекенсем йышлăн çÿреççĕ. Пĕлтĕр, сăмахран, 450 вĕренекене явăçтарма май килнĕччĕ.
2016-2017 вĕренÿ çулĕнче те шкул ачине хушма пĕлÿ илме пулăшакан 31 вĕренÿ пĕрлешĕвĕ ĕçлет. Вĕсен шутĕнче çитĕнекен ăрăва наукăпа, техникăпа туслаштараканнисем те, экологипе биологи, туризмпа краеведени енĕпе ĕçлекеннисем те пур. Шкулсем çумĕнче ĕçлекен кружоксенчен хăшĕ-пĕри вĕренекенсемшĕн чăннипех те пĕлтерĕшлĕ пулса тăчĕ. Сăмахран, Элĕкри вăтам шкулта технологи енĕпе кружок ертсе пыракан Татьяна Петухова патне темиçе çулах ачасем йышлăн çÿреççĕ. Вĕсем район шайĕнчи çеç мар, республикăри конкурссене те хастар хутшăнаççĕ. Техника, робототехникăпа кăсăкланакансем Юнтапари, Тавăтри шкулсенче йышлăн вĕренеççĕ. Асăннă шкулсенче çак кружоксене опытлă педагогсем, Альбина Ананьевăпа Валентина Нестерова ертсе пыраççĕ. Çавăн пекех Юнтапари вăтам шкулта Светлана Мукина йĕркелекен «Логомир» кружок та тавçăруллисемпе çивĕч ăслисене пуçтарать. Асăннă шкулта чăваш чĕлхине вĕрентекен Зоя Леонтьева вара тăван халăх йăли-йĕркине сыхласа, мăн асатте-асаннесен чĕлхине упраса хăварас шутлисене «Хунав» пĕрлешĕве пухнă. Сăмах май, асăннă вĕренÿ учрежденийĕ Элĕкри И.Я.Яковлев ячĕллĕ вăтам шкул хыççăн ачасене кружоксене явăçтарассипе иккĕмĕш вырăнта.
Ачасемпе çамрăксен пултарулăх центрĕ çумĕнчи хулăран тĕрлĕ япала хатĕрлеме вĕрентекен кружок та чăн-чăн ăстасене хатĕрлет. Унччен ăна Йăлкăшри тулли мар вăтам шкулта Олег Данилов ертсе пынă пулсан, халĕ вăл Элĕкри вăтам шкулта ĕçлет.
Районта вĕренÿ туризмне аталантарас тĕлĕшпе эпир республикăри конкурса хутшăнтăмăр. «Пĕчĕк çĕршыв сукмакĕпе» проекта хатĕрлесе Чăваш Республикин Пуçлăхĕн 200 пин тенкĕ грантне тивĕçрĕмĕр. Асăннă проект-программăна пурнăçа кĕртсе вĕренекенсемпе районти паллă вырăнсене çитсе курма палăртатпăр.
Элĕкри ачасемпе çамрăксен пултарулăх центрĕ шкул ачисемпе çеç мар ача садне çÿрекенсене те тимлĕхсĕр хăвармасть. Шăпăрлансем хушшинче те чи пултаруллисене тупса палăртас тĕллевпе тăтăшах конкурссем йĕркелетпĕр. Асăннă мероприятисенче уйрăмах «Çăлкуç» ача садне çÿрекенсем хастарлăхпа палăраççĕ. Кашни конкурсах хăйсен ĕçĕсене тăратаççĕ. Ку енĕпе ытти ача сачĕсене, шкулсем çумĕнчи ушкăнсене çÿрекенсене те хутшăнма сĕнес килет.
Ăсталăха пĕчĕкрен аталантарни, пултарулăха туптани çитĕнÿ патне илсе çитеретех. Тен, çитĕнсен инженерсем, модельерсем, вăйлă математиксем тата ытти професси çыннисем пулĕç вĕсем.
Олимпиада ЛАЗАРЕВА, центр директорĕ.