25 октября 2016 г.
Сĕт яланах тупăш çăлкуçĕ шутланнă. Çав вăхăтрах вăл хаклă чĕртавар та. Ял çынни патшалăха сĕт парса килти хушма хуçалăха аталантарма, пурнăçа саплаштарса пыма тăрăшать. Паянхи кун районта чылай предприниматель халăхран сĕт пуçтарассипе ĕçлет. Çавăн пекех ял хуçалăх предприятийĕсем те сĕт сăвассипе кăтартусене лайăхлатса пыраççĕ.
Кăçалхи январьтен пуçласа октябрĕн 21-мĕшĕччен районти мĕнпур категориллĕ хуçалăхсенче 59,661 тонна сĕт туса илнĕ. Вĕсенчен 48,050 тонна килти хушма хуçалăхсенчен, 11,611-шне ял хуçалăх предприятийĕсемпе хресчен-фермер хуçалăхĕсенче сунă. Иртнĕ çулхи çав тапхăртипе танлаштарсан сĕт туса илни - 86 процент. Кашни ĕнерен сĕт сăвасси вăтамран 5147 килогрампа танлашнă, иртнĕ çулхинчен 442 килограмм нумайрах. Сĕт туса илессипе «Новый путь», «Авангард», Ульянов ячĕллĕ, «Правда» хуçалăхсем япăх мар ĕçлеççĕ. Пĕр ĕнерен сăвассипе чи малта «Новый путь» хуçалăх пырать, 20,6 кг суса илет. Вăл пĕлтĕрхипе танлаштарсан сăвăма 800 грамм ÿстернĕ. «Авангард» хуçалăхра ĕнесем сĕте ытларах пама пуçланă. Пĕлтĕр çак тапхăрта кашни ĕнерен 9,6 кг сунă пулсан, кăçал 13,7 кг суса илнĕ. Ульянов ячĕллĕ тата «Правда» хуçалăхсен сăвăм иртнĕ çулхинчен чакнă. Ульянов ячĕллĕ хуçалăхра пĕр ĕнерен 13,6 кг (иртнĕ çул - 15,0 кг), килти хушма хуçалăхсенче 11,4 (пĕлтĕр - 11,3) килогрампа танлашнă.
Кăçалхи октябрĕн 21-мĕшĕ тĕлне илсен, мĕнпур категориллĕ хуçалăхсенче ĕнесем 4902 пуç, çав шутран ял хуçалăх предприятийĕсенче 597 пуç шутланать. Уйрăм çынсен хуçалăхĕнче пĕлтĕр 4439 пуç мăйракаллă шултра выльăх пулнă, кăçал 4229 пуç шута илнĕ. Сумалли ĕнесен шучĕ чакнăран килти хушма хуçалăхра сĕт суса илесси те пĕчĕкленни сисĕнет.
А.ТУВАНСКАЯ.