03 ноября 2016 г.
Агропромышленность комплексĕнче машина-трактор паркне май килнĕ таран çĕнетсе пыма тăрăшаçĕ. Укçа-тенкĕ енчен йывăрлăх тăрсан хуçалăхсемпе предприятисем пур пеккипе кирлĕ пек усă кураççĕ. Анчах та техникăн ĕмĕрĕ вăрăм пултăр тесен ăна упрама пĕлни кирлĕ. Ку енĕпе тимлени пысăк пĕлтерĕшлĕ. Çав тĕллевпе ĕçрен пушаннă техникăна хĕл каçарма лартассине тĕрĕслессипе районта смотр-конкурс иртрĕ.
Çавна май ыррине палăртма кăмăллă ĕнтĕ. Ял хуçалăх предприятийĕсем техникăна лайăх упрас, машина-трактор паркĕсенче йĕрке тăвас, пурлăх базине вăйлатас тата мĕнпур техникăпа чылай çул усă курас тесе сахал мар ĕç туса ирттернĕ, агрегатсене юсаса, çуса лартнă.
Районта ăна хĕл каçарма вырнаçтарса лартас енĕпе «Правда», «Алмаз», «Новый путь», Ульянов ячĕллĕ хуçалăхсенче йывăр техникăна витнĕ ангарсене кĕртсе лартнă. Ял хуçалăх предприятийĕсенче техникăна çĕнетессипе ĕçсем ăнăçлă пулса пыраççĕ тесе мухтанмалли çук. Çакăн сăлтавĕ - кăçал хăш-пĕр хуçалăхсенче укçа-тенкĕ çитсе пыманни. Çапах та çак йывăрлăхсене пăхмасăрах май килнĕ таран çĕнĕ машина-трактор туянма пултараççĕ. 2014 çулта, сăмахран, районта çĕнĕ техника 21 единица туяннă. Техникăна тĕплĕн хĕл каçарма лартасси çине кашни хуçалăхах тăрăшса ĕçлерĕ. Анчах та çав хушăрах хăш-пĕр çитменлĕхсем пуррине те асăрхарăмăр. Техникăна чи лайăх упранине, пурлăхпа техника базине çирĕплетнине, техника юсавлăхĕн шайне ÿстерессине шута илсе смотр-конкурсра «Новый путь» хуçалăх пĕрремĕш вырăна тухрĕ. «Алмаз» общество - иккĕмĕш, Ульянов ячĕллĕ хуçалăх виççĕмĕш вырăнсене çĕнсе илчĕç.
Константин МАЙОРОВ,
районти патшалăх техника тĕрĕслевĕн ертÿçи.