Публикации » Качака йышлă усраççĕ

08 ноября 2016 г.

Качака чăрсăр выльăх пулсан те хуçине пысăк усă кÿнине те пытарма кирлĕ мар. Çавăнпа чылай ялта юлашки тапхăрта çак выльăха ытларах усрама пуçлани сисĕнет. Ку чухне ăна аслă ăрури çынсен кил хуçалăхĕнче тăтăшрах тĕл пулатпăр. Вĕсем çак чĕмсĕр выльăха чылай чиртен хăвăртах сипленме пулăшакан сĕт панишĕн усраççĕ. Пурнăçра хура-шурне сахал мар курнисем качака сĕчĕ шăмăсене, иммунитета çирĕплетнине, чĕрепе юн тытăмĕн ĕçне лайăхлатнине, уйрăмах пĕчĕк ачасемшĕн усăллă пулнине пĕлеççĕ. Ехремкасси тăрăхĕнчи Пĕчĕк Кăканар ялĕнче темиçе хуçалăхрах çак выльăха курма пулать. Сăмахран, Мария Александрова качакасене темиçе çулах усрать. Çавăн пекех Мăн Кăканарти Раиса Брусниковăн, Георгий Никитинăн хуçалăхĕсенче те йышлă вĕсем. Аслă çулсенчисем качака пăхнине кура усă панине те пытармаççĕ. Сĕчĕ, ытти юр-варĕ те татăлмасть вĕсен сĕтелĕ çинчен.