11 ноября 2016 г.
Выльăх тухтăрĕн ĕçĕ çăмăл мар тата яваплă. Ăшă пÿлĕмре хут çырса ларасси кăна мар, вăхăтра профилактика мероприятийĕсем ирттересси те тĕп тĕллевсенчен пĕри пулса тăрать.
Ураскилтри ветеринари лечебницинче тăрăшакансем ир пуçласа каçчен ура çинче. Ларса канма вăхăчĕ те çук вĕсен. Лилия Калмыкова заведующи, Геннадий Калмыковпа Любовь Шленская фельдшерсем 8 яла пăхса тăраççĕ: Ураскилт, Тури Выла, Шĕнтреш, Мăн Тукташ, Кĕçĕн Тукташ, Мăн Вылă, Çирĕккасси, Атмалкасси ялĕсем. Çавăн пекех Ульянов ячĕллĕ хуçалăхри тата «Золотое Руно» сурăх ферминчи выльăх-чĕрлĕхшĕн те яваплă фельдшерсем.
Вĕсем графикпа, ĕç планĕпе килĕшÿллĕн ялсем тăрăх çÿресе килти выльăх-чĕрлĕхе чир-чĕр ересрен, сарăласран прививкăсем тăваççĕ. Унсăр пуçне килти хуçалăхра выльăх чирлесен те фельдшерсем аякра тăрса юлмаççĕ. Ĕçе чунтан парăннăран çынсем выльăх чирлени çинчен пĕлтерсен вĕсем çийĕнчех вырăна çитеççĕ.
«Килти выльăхсене прививка туни чылай чиртен сыхланма май парать. Юлашки вăхăтра йытăсене прививка тунине те ырласа йышăнмалла. Вĕсене халĕ килĕрен регистрацилетпĕр, кашнинпе уйрăм карточка хатĕрлетпĕр. Унта вĕсене хăçан прививка тунине палăртатпăр», - каласа парать Ураскилтри ветеринари лечебницинче чылай çул тăрăшакан Любовь Шленская фельдшер. Ахальтен мар ĕнтĕ унăн ĕçченлĕхĕпе тăрăшулăхне кура ăна иртнĕ кунсенче ял хуçалăхĕнче тата продукци тирпейлекен промышленноçра ĕçлекенсен уявĕнче район администрацийĕн Хисеп хучĕпе чысларĕç.
Çывăрман каçсем те чылай выльăх тухтăрĕсен. Халĕ фельдшерсем сыснасене Африка чуми ересрен асăрхаттарса халăхпа профилактика калаçăвĕсем ирттереççĕ.
В.НИКИФОРОВА.