09 декабря 2016 г.
Ĕнер, декабрĕн 8-мĕшĕнче, Элĕкри культура çуртĕнче «Единая Россия» политика партийĕн Элĕк ра- йонĕнчи вырăнти уйрăмĕн отчетпа суйлав конференцийĕ иртрĕ. Унăн ĕçне Чăваш Республикин Патшалăх Канашĕн Председателĕн çумĕ, «Единая Россия» партин Чăваш регион уйрăмĕн секретарĕ Николай Малов, район пуçлăхĕ Владислав Волков хутшăнчĕç. Конференци ĕçне «Единая Россия» партин Элĕк районĕн вырăнти уйрăмĕн секретарĕ Александр Куликов ертсе пычĕ.
Конференци хăйĕн ĕçне пуçăнсанах Николай Малов сăмах илчĕ. Николай Владимирович «Единая Россия» партин Элĕк районĕн вырăнти уйрăмĕн секретарьне, район администрацийĕн пуçлăхне Александр Куликова тата парти членĕсене тав сăмахĕ каларĕ. «Куллен туса пынă ĕçсем çитĕнÿ патне илсе пыраççĕ. Çакна юлашки икĕ çул хушшинче иртнĕ суйлав кăтартăвĕсем çирĕплетсе пачĕç. Халăха шантарса каланă сăмахсене тÿрре кăларма тăрăшмалла. Умри тĕллевсене пĕр командăра пулсан çеç пурнăçлама пултаратпăр», - терĕ Шупашкар хăни. Ун хыççăн тăрăшулăхпа палăрнă ентешсене Тав çырăвĕсемпе чысларĕ.
Тĕп докладпа Александр Куликов тухса калаçрĕ. Вăл 2012 çулхи июлĕн 23-мĕшĕнчен пуçласа паянхи кунччен туса ирттернĕ ĕçсемпе тĕплĕн паллаштарчĕ. Александр Николаевич республика тата ра-йон аталанăвĕнчи çитĕнÿсем çинче чарăнса тăчĕ, çивĕч ыйтусемпе ĕçлемеллине те асăнса хăварчĕ. Доклад хыççăн «Единая Россия» партин Чăваш регион уйрăмĕн членĕ, Элĕк вăтам шкулĕн вĕрентекенĕ Эдикт Волков тата район пуçлăхĕ, район депутачĕсен Пухăвĕн председателĕ Владислав Волков сăмах илчĕç, малалла аталанма оппозици вăйĕ пурри питех те пĕлтĕрĕшлĕ пулнине палăртрĕç.
Çавăн пекех пухăннисем Вырăнти тĕрĕслев комиссийĕн отчетне итлерĕç. Ку ыйтупа комисси председателĕ Геннадий Соколов сăмах илчĕ.
Конференцин кун йĕркипе килĕшÿллĕн делегатсем «Единая Россия» партин Элĕк районĕн вырăнти уйрăмĕн секретарьне, Вырăнти политканаш тата тĕрĕслев комиссийĕн членĕсене суйларĕç. Вăрттăн сасăлав мелĕпе усă курса кашниех хăйĕн шухăшне пĕлтерчĕ. Шутлав комиссийĕ палăртнă тăрăх, партин вырăнти уйрăмне ертсе пыма Александр Куликова шанчĕç. Уншăн делегатсем ытларах сасă панă.
Пухăннисем Пĕтĕм Раççейри «Единая Россия» политика партийĕн Чăваш регион уйрăмĕн XXV Конференцине хутшăнма Александр Куликовпа Владислав Волкова суйларĕç.
Марина ЛЕОНТЬЕВА.