14 декабря 2016 г.
Иртнĕ шăматкун, декабрĕн 10-мĕшĕнче, районти мĕнпур спорт сооруженийĕнче Сывлăхпа спорт кунĕ иртрĕ. Çак кун район çыннисен тата хăнасен хăйсен сывлăхне тÿлевсĕрех çирĕплетме тата канăва усăллă ирттерме май пулчĕ.
Физкультурăпа спорта кăмăллакансем тата спортсменсем Элĕкри «Хĕлхем» спорт шкулĕнче волейбол, футбол, сĕтелçи теннисĕ, шашкăпа шахмат вăййисенче вăй виçрĕç. Район администрацийĕн, «Пурнăç çулĕпе» район хаçачĕн тата ытти учрежденисен ĕçченĕсем Пĕтĕм тĕнчери физкультурăпа спорт комплексĕн ГТО нормативĕсене пачĕç. Кунта 18 çултан аслăрах çынсем (X-XI) хутшăнчĕç.
«Пурнăç çулĕпе» хаçат коллективĕ хăйсен страницисенче тăтăшах спорт ăмăртăвĕсене çутатса тăрать, районта çуралса ÿснĕ, çĕршывăн тĕрлĕ кĕтесĕнче пурăнакан спортсменсем тата вĕсен çитĕнĕвĕсем çинчен халăха пĕлтерет. Коллектив хăй те спорт ăмăртăвĕсенчен аякра юлмасть. Хальхинче вара вĕсем те физкультурăпа тата спортпа туслă пулнине кăтартса пачĕç. Сывлăхпа спорт кунĕнче калем ăстисем ыттисемпе танах маттур та хастар пулни яр уççăнах курăнчĕ. Вĕсем выртса алăсемпе хутламсем тăвассинче, урасене хуçлатмасăр малалла туртăнассинче, пневматика винтовкинчен перессинче, выртса кĕлеткене çĕклессинче, вырăнтан тăршшĕне сикессинче пуçарулăхпа палăрчĕç.
Çак кун «Хĕлхем» спорт шкулĕнче арçынсен командисем хушшинче чылай çул тухтăр пулса ĕçленĕ, спорта юратнă Юрий Мулюкова асăнса уçă волейбол турнирĕ иртрĕ. Унта арçынсен 4 команди хутшăнчĕ. Çивĕч те хĕрÿ тупăшура Муркаш районĕн «Ударник» команди пĕрремĕш вырăн çĕнсе илчĕ, «Свобода» команда иккĕмĕш пулчĕ пулсан, пирĕн районăн «Карачура» команди пьедесталăн виççĕмĕш картлашки çине хăпарса тăчĕ, «Центр» команда тăваттăмĕш вырăн йышăнчĕ.
Çĕнтерÿçĕсемпе призерсене кубокпа, Хисеп хучĕсемпе, медальсемпе тата укçан парнепе хавхалантарчĕç. Районти ытти спортзалта та физкультурăпа спорт ăмăртăвĕсем иртрĕç, вĕсене те çынсем хастар хутшăнчĕç.
Спорт - сывлăх çăлкуçĕ. Сывă пурнăç йĕркине тытса пыни пуриншĕн те ырă тĕслĕх пулнине ГТО нормативĕсене паракансем тата физкультурăпа спорта кăмăллакансем тепĕр хут çирĕплетсе пачĕç.
Вера МОРОЗОВА.