Публикации » Кино курма та,ĕçлеме те ÿркенмерĕмĕр

20 декабря 2016 г.

Раççейри Кино çулталăкĕ вĕçленсе пырать. Кино çулталăкĕ пирĕн обществăра пысăк пархатарлă принципсене тата эстетика туйăмне çирĕплетмелли тепĕр утăм пулса тăрассине палăртнăччĕ Раççей Президенчĕ Владимир Путин. Кăçал пирĕн кино курма çеç мар, ун пирки ытларах калаçма та, пĕлме те тÿр килчĕ.

Декабрĕн 19-мĕшĕнче Элĕкри культура çуртĕнче те Раççейри Кино çулталăкне тата Чăваш Республикинче Ĕç çыннин çулталăкне пĕтĕмлетсе пысăк мероприяти иртрĕ. Чи малтанах залра пухăннисене Элĕкри ача-пăча ÿнер шкулĕн маттурĕсем ташăсемпе савăнтарчĕç, Нелли Львова илемлĕ юрă шăрантарчĕ. Залра ларакан хĕрачасемпе арçын ачасем илемлĕ фильм пуçланасса чăтăмсăррăн кĕтрĕç. Урамра мамăк евĕр çăвакан юр та, катаччи те илĕртмерĕ çак кун шăпăрлансене.

14 сехет тĕлне уçă сывлăшра уçăлса тата выляса çÿрекен ача-пăча культура çуртне васкарĕ. Районти вĕренÿ учрежденийĕсенчи шкул ачисем тата вĕрентекенсем акцие тĕпе хурса кăтартакан «Вовочка» илемлĕ фильм курса киленчĕç. Залра çутă сÿнсен тата сцена çинчи экран çутăлсан хыçалти ретри ларма-тăма пĕлмен арçын ачасем те шăпланчĕç.

«Çакăн йышши акцисем ирттерни пире, шкул ачисене, савăнтарать. «Вовочка» илемлĕ фильм питĕ килĕшрĕ. Шкул ачисен кулленхи пурнăçне кинора пур енлĕн çутатса панă», - кино хыççăнхи кăмăл-туйăма пĕлтерчĕç Элĕк вăтам шкулĕнче пĕлÿ илекен Мария Соколова, Нелли Львова тата Ольга Ильина.

Раççейри Кино çулталăкне пирĕн республикăра «Кино кунĕ» акци пĕтĕмлетрĕ. Асăннă пысăк калăпăшлă мероприяти Чăваш Енри мĕнпур хулапа районта Культура, национальность тата архив ĕçĕсен министерстви, Чăваш Республикин Ĕç тата социаллă хÿтлĕх министерстви, çавăн пекех вырăнти хăйтытăмлăх органĕсем йĕркеленипе иртрĕ.

Каçхи 18 сехетре савăнăçлă мероприятире кино тытăмĕнче ĕçленĕ çынсене тата Ĕç çыннин çулталăкĕнче палăрнисене чысларĕç.

Вера МОРОЗОВА.