20 декабря 2016 г.
Вĕренÿ çулĕ анчах пуçланнăн туйăнать. Унтанпа вара виçĕ уйăх юлнă та иккен. Çак кунсем мĕнле иртсе кайнине сиссе те юлаймарăмăр, мĕншĕн тесен шкулти кунсем пĕрин хыççăн тепри тата интереслĕрех иртсе пыраççĕ.
Кашни кунĕ хăйне евĕр. Чи асра юлнă кунсем те чылай. Уйрăмах маншăн физика, биологи, алгебрăпа геометри тата чăваш чĕлхи урокĕсем иртнĕ кунсем питĕ интереслĕ. Вĕсене уйрăмах кăмăлланăран чăтăмсăррăн кĕтетĕп. Алгебрăпа геометри урокне Галина Валерияновна Осипова ертсе пырать. Уроксене пĕринчен теприне кăсăклăрах ирттерме тăрăшать вăл. Пĕр евĕрлĕ задачăсенех тĕрлĕрен шутлама вĕрентет. Унăн урокĕсем мĕнле иртсе кайнине сиссе те юлаймастпăр эпир. Биологи вĕрентекен Алина Ильинична Ивановăна, физика вĕрентекен Алексей Радомирович Иванова та ырăпа асăнса хăварас килет. Ытти предметсене те кăмăллатăп эпĕ, анчах та кăсăклă задачăсене шутласси ытларах илĕртет мана.
Паллах, шкулта уроксем кăна пулмаççĕ. Вĕренÿ хыççăн тĕрлĕ мероприяти иртет. Тĕслĕхрен, кĕркунне «Кĕрхи бал», Амăшсен, Сывлăх кунĕсем уйрăмах интереслĕ пулчĕç. Вĕсене Надежда Андреевна Иванова йĕркелесе ертсе пырать. Уявсенче пĕр ачана та кичем мар. Пурне те хутшăнтарма, интереслентерме пĕлет вăл. Паллах, класс ертÿçисем те ачасене хавхалантарсах тăраççĕ. Вĕсем пулăшнипе ачасем тĕрлĕрен сценкăсем, сăвăсем, юмахсем лартаççĕ.
Тени шкулĕн вĕрентекенĕсем кунтан ăслă та пултаруллă ачасем вĕренсе тухчăр тесе тăрăшаççĕ.
Евгений ЗАХАРОВ, Тени шкулĕ.