23 декабря 2016 г.
Черетлĕ çулталăк хыçа юлать, тĕрлĕ çитĕнÿсемпе пулăмсенчен пуян пулнă этем пурнăçĕнчи черетлĕ страница хупăнать. Унпа пĕрлех эпир Раççейри - Кино, Чăваш Енри Ĕç çыннин çулталăкĕсене ăсататпăр. Пĕр шутласан, вĕсем хушшинче нимĕнле çыхăну та çук пек туйăнакан çулталăксем, анчах пĕр-пĕринпе уйрăлми çыхăнса тăнине тÿрремĕнех асăрхатăн. Кино аталанăвне шăп та шай ĕç çынни пысăк тÿпе хывнă тесен те йăнăшмăп. Кинематографсем ытларах чухне хăйсен ĕçне чунтан парăннă çынсен тĕслĕхне тĕпе хурса илемлĕ фильмсем хатĕрлеççĕ. Çапла майпа ĕç династийĕсем, пысăк çитĕнÿсене тивĕçнисем кино кадрĕсенче юлаççĕ.
Çакна декабрĕн 19-мĕшĕнче Элĕкри Культурăпа кану керменĕнче савăнăçлă лару-тăрура иртсе пыракан пĕлтерĕшлĕ çулталăксене хупни те çирĕплетет.
Асăннă культура учрежденийĕн фойинче Чăваш Енри Ĕç çыннин çулталăкне халалласа ирттернĕ мероприятисенчен тата район çыннисен ĕç-хĕлне сăнлакан сăн ÿкерĕкĕсенчен пысăк стенд хатĕрленĕ. Уяв пуçланиччен аслисемпе танах ача-пăча та тивĕçлипех хак пачĕ ăна. Унпа юнашарах выр- наçтарнă тепĕр стенд та тĕрлĕ ăрурисене хăй патне илĕртрĕ. Тăван çĕршывăн кино аталанăвне пысăк тÿпе хывнă актерсен сăнĕсемпе паллашма пултарчĕç унта. Çавăн пекех темиçе теçетке çул каялла ялсенче кино кăтартнă тĕрлĕ оборудование туллин шĕкĕлчерĕç уява килнĕ шăпăрлансем. Кунтах чăваш тĕррине тĕрлеме вĕренме, вĕт шăрçаран мăй çыххисем хатĕрлеме, тĕрлĕ хăюран илемлĕ япаласем маçтăрлама та вĕренме май пулчĕ.
Раççейри Кино, Чăваш Енри Ĕç çыннин çулталăкне хупма районта тĕрлĕ çĕрте тăрăшакансем килнĕ-ха. Пĕрремĕш ретре вара районта пурăнакансене кино кăтартас ĕçре чылай çул тăрăшса хисепе тивĕçнĕ ветерансем вырнаçнă. Вĕсен йы- шĕнче Раиса Кротовăна, Вольт Капитонова, Владимир Антонова, Иван Лаврентьева, Калерия Порфирьевăна, Георгий Гаврилова, Станислав Якимова, Олег Чугунова, Павел Павлова, Сергей Андреева курма пулчĕ.
Уява район пуçлăхĕ Владислав Волков уçрĕ. Пухăннисене саламланă май ĕç çынни кирек хăçан та тĕп вырăнта пулнине палăртса каларĕ. Шăп та шай хăйĕн ĕçне тÿрĕ кăмăлпа пурнăçлакан тĕрлĕ професси çыннин çитĕнĕвĕнчен район аталанăвĕ, çĕршыв малашлăхĕ килнине çирĕплетрĕ.
- Раççейри - Кино, Чăваш Республикинчи Ĕç çыннин çулталăкĕсенче Элĕк район территорийĕнче пысăк пĕлтерĕшлĕ ĕçсем сахал мар турăмăр. Пĕтĕмпех вĕсене Тăван çĕршывра туса кăларнă кино пĕлтерĕшне ÿстерес, рабочи профессисен ят-сумне хăпартас, ĕçрен хăраман çынна хавхалантарас тĕллевпе йĕркеленĕ. Ку çулталăксене тивĕçлипе ирттертĕмĕр пулин те малашне те ĕç çынни çине тимлĕх уйăрма пăрахмăпăр. Ĕç çынни яланах хисепре, - палăртса каларĕ район администрацийĕн пуçлăхĕ Александр Куликов. - Çитес çул вара Раççейре - Экологи, Чăваш Енре Амăшĕпе Ашшĕн çулталăкне паллă тăватпăр. Экологи пирĕн пурнăçра тĕп вырăн йышăнать. Сывлăха, илемлĕхе, йĕри-тавралли лару-тăрăва пĕрлештерсе тăрать çак ăнлав. Çавăнпа та район çыннисен хамăр йĕри-тавралли çут çанталăк çинчен самантлăха та манмалла мар. Ашшĕ-амăшĕпе ачисем хушшинчи çыхăнусене вăйлатакан мероприятисем те сахал мар пулĕç-ха 2017 çулта.
Александр Куликов ĕçре палăрнисене чысларĕ. Чăваш халăхĕ умĕнчи ĕçсемшĕн Ураскилт клуб заведующине Марина Степановăна тата Юнтапа шкулĕнче тăрăшакан Светлана Константиновăна Чăваш Наци конгресĕн Хисеп хучĕпе, районăн обществăпа политика пурнăçне хастар хутшăннăшăн Светлана Железновăна «Единая Россия» партин Тав хучĕпе (сăн ÿкерчĕкре) чысларĕç. Çавăн пекех Элĕкри культура çурчĕн коллективĕ, район администрацийĕн культура секторĕн тĕп специалисчĕ Лилия Никифорова Республикăри Халăх пултарулăх центрĕн Тав хутне тивĕçрĕç. Элĕк районĕнче кинофикаци енĕпе ĕçленисене вара район пуçлăхĕн Тав хутне тата парнесем пачĕç.
Хыççăн сцена çине артистсем тетрализациленĕ представленипе тухрĕç. Унта Элĕкри культурăпа кану керменĕнче тăрăшакансемпе пĕрлех ялсенчи пултарулăх ушкăнĕсем, Элĕкри ача-пăча ÿнер шкулне, «Штрих-кода» çÿрекен ачасем хутшăнчĕç.
Эльвира КУЗЬМИНА.