30 декабря 2016 г.
Бокс - пурин кăмăлне те каякан спорт тĕсĕ тееймĕн. Ку чухне пултарулăх пулни çеç çителĕксĕр, çирĕп кăмăл та пысăк витĕм кÿрет. Тăтăшах тренировкăсене çÿрени ăсталăха ÿстерме пулăшать. Кунсăр пуçне боксерăн рингра çапнине пула ыратнине тÿссе ирттерме хăнăхмалла. Шăп та шай çакă ĕнтĕ чылайăшĕ умне шикленÿ кăларса тăратать те. Элĕкри ачасемпе çамрăксен «Хĕлхем» спорт шкулĕн бокс секцине тĕрлĕ çулсенчи шкул ачисем çÿреççĕ. Ку чухне арçын ачасемпе хĕр ачасене бокс вăрттăнлăхĕсене вĕрентнипе пĕрлех хăйсене рингра тытма хăнăхтарасси çине те тимлĕх уйăрма тивет. Çакă вара чылай турнирта пулăшать те ĕнтĕ.
Декабрĕн 22-25-мĕшĕсенче Çĕнĕ Шупашкарти Олимп резервĕсене хатĕрлекен спорт шкулĕнче 1998-1976 çулсенче çуралнă арçынсемпе хĕрарăмсем, 1999-2000 çулсенче çуралнă юниорсемпе юниоркăсем, 2001-2002, 2003-2004 çулсенче çуралнă арçын ачасемпе хĕрачасем хушшинче бокспа Чăваш Республикин Чемпионачĕпе Первенстви иртрĕ.
Элĕк районĕнчен асăннă ăмăртăва виçĕ ÿсĕмри çамрăк боксерсем хутшăнчĕç. 2001-2002 çулсенче çуралнисем хушшинче 80 килограмлă виçере Элĕкри вăтам шкулта пĕлÿ илекен Даниэль Семенов ринга тухрĕ. Унччен те республика, Раççей шайĕнчи ăмăртусенче палăрнă çамрăк ку хутĕнче те пурне те парăнтарса пĕрремĕш вырăна тухрĕ. 1999-2000 çулсенчисен ÿсĕмĕнче вара Элĕкри «Хĕлхем» ачасемпе çамрăксен спорт шкулĕнче ăсталăхне ÿстернĕ, халĕ Шупашкарти Олимп резервĕсене хатĕрлекен шкулта вĕренекен Евгений Шашкин палăрчĕ. 75 килограмлă виçере Çирĕккасси ачи пьедесталăн 2-мĕш картлашки çине хăпарчĕ.
Аслисен ушкăнĕнче вара, 1998-1976 çулсенче çуралнисем хушшинче, Тени тăрăхĕнчи Анастасия Мурзаковăна çитекенни пулмарĕ. Вăл 51 килограмлă виçере 1-мĕш вырăна çĕнсе илчĕ.
Ку çитĕнÿсемпе Элĕк çамрăкĕсем çитес вăхăтра Атăлçи тăрăхĕнче иртекен Чемпионатпа Первенствăна хутшăнма тивĕçрĕç. Чăваш Республикин боксерсен пĕрлехи командине лекрĕç.
Владимир ГОРДЕЕВ, тренер.