17 января 2017 г.
Районти хуçалăхсенче вăрлăх хатĕрлессипе пурин те ĕç пĕр пек пымасть-ха. Сисĕнмесĕрех çураки те çитĕ, çапах та вăрлăх хывса хăварнипе кăна çырлахмалла мар, ăна тĕрĕслеттерессипе, çĕнетессипе те ĕçе хăвăртлатмалла. Паянхи куна илсен, кондициллĕ вăрлăх - 920 тонна. Ку планпа пăхнин 53 проценчĕ çеç. Акма юрăхлă марри - 815 тонна. Паллă ĕнтĕ, чылай культура çÿп-çаплă пулнă пирки юрăхлă мар. Эппин, вăрлăха, пĕр тăхтаса тăмасăрах аласа тасатассине йĕркелемелле. Ку енĕпе хальлĕхе «Новый путь», «Авангард» хуçалăх ĕçченĕсем яваплăха туйса ĕçлеççĕ. Вĕсем паха вăрлăхшăн тăрăшни курăнать. В.Узянов, С.Александров, А.Григорьев ертсе пыракан хресчен-фермер хуçалăхĕсенчи акмалли пĕтĕм тĕш тырă культурисене тĕрĕслев витĕр кăларнă, кондицие кĕртнĕ.
Çакна палăртмалла, районти кашни хуçалăхăнах вăрлăха çĕнетессипе е çĕннине туянассипе тĕлĕрмелле мар. Ĕçе хальтерех пуçăнни çур акине ăнăçлă пурнăçлама çăмăллатать.