24 января 2017 г.
Январĕн 21-мĕшĕнче республикăра хĕллехи спорт тĕсĕсен Центрĕнче йăлана кĕнĕ тăрăх Чăваш Ен Пуçлăхĕн парнисене çĕнсе илессишĕн йĕлтĕрпе чупассипе спорт çемйисем хушшинче ăмăрту иртрĕ. Кăçал унта 111 команда хутшăнчĕ. Пирĕн район чысне Йăлкăш ял тăрăхĕнчи Павловсен тата Элĕк ял тăрăхĕнчи Смирновсен çемйисем хÿтĕлерĕç. Ăмăрту эстафета евĕр 5 ушкăнпа иртрĕ. Ашшĕсем 1,5 çухрăм, амăшĕсем 800 метр, ачасем 400 метр парăнтарчĕç. Павловсем «Ашшĕ, амăшĕ, 17 çулчченхи 4 ача» ушкăнра - пĕрремĕш вырăн, Смирновсем «Ашшĕ, амăшĕ, 17 çулчченхи 2 ача» ушкăнра çĕнтерчĕç. Çĕнтерÿçĕ командăсен ашшĕ-амăшне Чăваш Ен Пуçлăхĕн Михаил Игнатьевăн сехетне парнелерĕç, дипломсемпе тата медальсемпе чысларĕç.