24 января 2017 г.
2003 çул халĕ те асра-ха. Тин кăна вăтам шкул пĕтернĕ çамрăксем хуланалла çул тытрăмăр. Унччен малтан студентсен пурнăçĕ çинчен яла килекен тус-юлташран кăна пĕлеттĕмĕр. Хăвăртрах шкул пĕтерсе студент пулас килетчĕ.
Июль уйăхĕнче пире, И.Н.Ульянов ячĕллĕ Чăваш патшалăх университечĕн чă-ваш филологийĕпе культура факультечĕн абитуриенчĕсене, вĕренме илни çинчен пĕлтерчĕç те тÿрех ял хуçалăх практикине ĕçлеме ячĕç. Вĕренÿ çулĕ пуçланиччен пĕр-пĕринпе туслашмалли тапхăр пулнă та ун чухне. Епле интереслĕ те савăк вăхăт! Ирхи 7 сехетре хăяр-помидор, купăста тăварлама, консервлама цеха каяттăмăр та каç пуличченех унта тăрăшаттăмăр. Шăпах çавăн чухне эпир пĕрремĕш ĕç укçине ĕçлесе илнĕ те. Каçхи апат хыççăн алла гитара тытса юрăсем шăрантарни те асрах.
Элĕксем пурĕ 10 ытла çамрăк вĕренеттĕмĕр курсра. Акă, «наука гранитне» пĕрле шĕкĕлченĕ «Асамат» ушкăн соличĕсемпе - Леонид Антоновпа, Еленăпа Валерий Кузьминсемпе вĕренме май килнĕшĕн савăнатăп. Пирĕн 14-03 ушкăнра Мăн Вылă, Ураскилт, Тавăт, Вăрманкас, Чăваш Сурăм, Ехремкасси, Шĕмшеш хĕрĕсемччĕ. Питĕ туслă пурăннă, киле парса янă ĕçсене те пĕрле пурнăçланă, пурте общежитире пурăннăран апата пĕр чашăкран çинĕ тесен те йăнăш пулмĕ.
Чи пĕрремĕш хут зачетпа экзамен тытнине епле манăн. Ыран экзамен тенĕ чухне кĕнеке умĕнче çĕрĕпе ларнине, общежитири пÿлĕм чÿречинчен «зачеткăна» кăларса «халява лек» тесе кăшкăрнине халĕ кулса аса илетĕп. Общежитире хăвна чăн-чăн студент пекех туятăн. Куç хупмасăр ирттернĕ каçсем, уявсем студент асĕнче яланлăха юлаççĕ: кухньăри тăварлă чей е тин кăна пиçнĕ яшка кастрюлĕ пуш-пушă пулни, алăк тăрринчи шыв... Темшĕн-çке студентсен хырăмĕ çĕрле выçатчĕ. Пĕçернĕ апата кухньăра вăхăтлăха хăварсан вăл «ураланнă» тĕслĕх те чылай пулнă-çке. Общежитире кашниех пĕр-пĕр мыскарана çакланма пултарнă.
Факультетра тата университетра иртекен мероприятисене яланах хутшăнма тăрăшнă. Уйрăмах наукăпа тĕпчев конференцийĕсем кăмăла каятчĕç. Кунта хăвăн пултарулăхна пур енлĕн кăтартма май пурччĕ. Çавăн пекех рефератсем çырма кăмăллаттăмăр. Ун чухне хальхи пек компьютер технологийĕ вăйлă аталанман, мĕнпур информацие пĕтĕмпех хамăр тĕллĕн библиотекăра ларса пухаттăмăр, алăпа çыраттăмăр. Спорт мероприятийĕсенчен те аякра тăрса юлман.
Университетра икĕ çул çурă вĕренсен ушкăнпа пĕрле экватора кайрăмăр. Пирĕн ушкăн кураторĕ - Ирина Юрьевна Кириллова. Хамăр ентеш. Сăмах май каласан, университетра ентеш преподавательсем татах та пурччĕ: Андрей Филиппов, Екатерина Афанасьева, Виталий Сергеев, Эльвира Родионова, Анна Иванова. Эпир, Элĕксем, пĕр-пĕрне ăнланнă, пулăшса пынă. Экваторта хамăрăн туслă çыхăнăва малалла та тăсма сăмах патăмăр. Унтанпа чылай çул иртрĕ, апла пулин те пирĕн туслăх тăсăлать, мĕншĕн тесен эпир пурте пĕр çемьери пек пурăннă. Виççĕмĕш тата тăваттăмĕш курссенче практикăра пулни те манăçмасть. Эпĕ Мăн Вылă шкулĕнче хамăн пултарулăха туптанăччĕ.
Университетран вĕренсе тухнăранпа кăçал 9 çул çитет. Апла пулин те студент чухнехи пурнăç яланах асра. Нихăçан манăçми савăнăçлă вăхăтсем.
Вера МОРОЗОВА.